Les roquetes izeneko aztarnategian (Tarrega, Katalunia) XIV-XV. mendeetako nekropoli judutarra aurkitu zuten joan den martxoan. 148 eskeleto aurkitu zituzten guztira, baina arrastoen ikerketa eten egin da, Bartzelonako komunitate juduak eskeletoak erreklamatu zituelako. Euren esanetan, “betiko atsedena ezin da inoiz urratu”. Berriki Kataluniako Generalitatek komunitatearen eskaera onartu du, eta arrastoak Bartzelonako Collserola hilerrian ehortzi dituzte judutar erritualei jarraiki. Arkeologoak, aldiz, ez daude ados erabakiarekin, ikerketa osatzea galarazi baitie. Hilobiak itxita daude, baina eztabaida zabalik dago: horrelako kasuetan zeri eman behar zaio lehentasuna? Arrastoak aurkitu ondoren eta, beraz, “atsedena profanatuta”, ez al du merezi ikerketak amaitu arte aritzea, gero arrastoak nahi bezala ehorzteko?