Uztailaren 31n MCC Taldearen lehendakaritzan aldaketa oso garrantzitsua gertatuko da. Orain arte Arrasateko kooperatiba taldeko presidente izan den Jesus Catania erretiratu egingo da eta Jose Maria Aldekoak hartuko du bere lekukoa. Euskal Herriko enpresarik garrantzitsuena da MCC. 100.000 langile inguru ditu eta aurten irabaziak %10 haztea espero dute 750 milioitara ailegatu arte. Ia-ia planeta guztiko herrialdeetan dago. Duela 50 urteko sorrera xumeaz geroztik Taldeko arduradun nagusiek izaera ekintzailea mantendu dute.
Giza ekintza orotako akatsak akats, kooperatiba Talde honek egindako lan izugarria aitortu beharra dago. Onartu beharreko elementurik garrantzitsuena, dena den, hain talde indartsu eta boteretsua izanda ere, dakigunez behintzat, sekula bere baitan eskandalu ekonomiko-finantzierorik gertatu ez izana da. Taldearen agintari gorenek sekula ez dituzte poltsikoak diruz gainezka eduki.
Eta beti ezaugarritzat izan dituzte diskrezioa eta zintzotasuna. Orain, MCCko lehendakaritzako aldaketa horrekin, identitate ikur horiek mantentzea eta hobetzea ere espero dugu. Iragarritako proiektu industrial eta jarduera berri horiek zehazten joatea eta osasuna, energia berriztagarriak edota trenarena bezalako sektore berrietan txertatzea nahiko genuke. Horrek guztiak Euskal Herriko enpleguaren etorkizunari on egingo lioke. MCCk aitorpen soziala merezi du. Gurea badu behintzat.
© 2008-2011 Argia.com - Komunikazio Biziagoa
Bero-beroan 
