ARGIA astekaria-Ipuin zaharrei jarriak

Bilaketa

Nabigazio menua

2090.zenbakia

Atalen nabigazio menua

110. zenb.

(ARGIAko 2090. zenbakiarekin batera banatua)

Hasiera >
Bertso berriak >
Ipuin zaharrei jarriak

2007-05-27 -- 2090.zenb

Ipuin zaharrei jarriak

Uxue Alberdi

Andoni Otamendi

Txanogorritxo

Amonaren etxeraino
nindoalarik kotxean,
Elgoibarko irteeran
tipo bat bide ertzean.
Gustura hartuko nuke
aurrean edo atzean…
Behatz lodia haizean,
ilea nahas-mahasean…
“Baina amona jango du!”,
esan zidaten etxean.
Beraz, otsoa utzita
bere bidegurutzean,
amonarena heldu naiz
gaur ere malaletxean.

Hiru txerritxoak

Harrizko baserri bat nahi
nuen mendian, larrean;
baina bankura joan eta
mila zero ezkerrean!
Harria garesti dago,
saia nadin egurrean…
Gazte soldata xu(hu)rrean
negarra daukat hurrean!
Lastozko bat egingo dut,
zerbait, bere kaxkarrean!
Otsoa badator baina
hortz gosetien aurrean
airezko etxe bat daukat
ta hura alkilerrean!

Peter Pan

Txikitan Peter Pan-en zain
egiten nuen gaubela
albora erretiratuz
gantxillozko errezela.
Banekien krokodilo
maltzur-maltzur bat bazela,
erloju bat jan zuela,
minutuz betez sabela…
Orain handitu naiz baina
beldurra dut, lehen bezela.
Badakit zer den estresa
eta alderantziz dela:
denborak krokodiloak
irentsi ohi dituela..

Hansel eta Gretel

Joan nahi nuke Malira,
joan nahi nuke Nepala,
ikusi nahi dut Singapur,
ukitu nahi dut Kerbala,
usaindu nahi dut Caracas
dastatu nahi dut Bengala
Mongolia, Guatemala,
Montevideo, Kampala…
Ez itzultzeko beldurrez
ez naiz joaten eta, hala,
gozokizkoa den arren
ohartu naiz, ze tamala…
etxea ogi apurrez
betetzen ari zaidala.

Mari Errauskin

Bere ilargi ta guzti
iritsi da larunbata.
Hamabiak dira baina
ez dut galduko zapata!
Printze usteko pila bat
dabil tabernan jiraka…
Atzetik diote “guapa!”,
buelta eman eta, kaka…
Nik bat dut gustuko baina
ipuinak egin dit tranpa!
Neuk joan behar izan dut
kalabazari tiraka;
zapata ez, bihotz puskak
eskaileretan lagata.

Pinotxo

Konturatu naiz sudurra
luzatzen ari zaidala.
Esan nuen betirako
maitatuko zintudala;
esan nuen: “Utziko dut
ta izango naiz formala…
Maitale hau? Berehala!
tabakoa utzi ahala”…
Baina gorri dut bihotza
eta hori atzazala.
Gezurti hutsa naiz baina
eskerrak nik zuk bezala
sudurra ebakitzeko
zerra bat badaukadala.

Erantzunak

DBHko nire ikasleei jarrri dizkiet entzun ditzaten, ipuinak lantzen ari baikara .Gustora entzun dituzte bere abtsean eta bide batez doinu berria ere ikasi dugu. Ipuin klasikoak nola eraldatu dituen eztabaidatzen aritu gara.

izena ixabel jauregi alberdi 0000-00-00 00:00:00

Bertso bikainak. Ederrak, originalak... gozatzen ari naiz Uxuezalea bihurtu naute

karlos 2007-05-25 09:31:51

Biziki bertso onak!karlosekin bat nator! batzuk koainomanoak dira... ni uxuemanoa. gauza bakarra jakin nahi nuke : zein da doinua? berria da?

uxuemanoa 2007-05-27 10:07:22

Azpialdean jartzen du bertsoak entzungai daudela helbide honetan, baina ez dut asmatzen. Argibideak ematerik bai?

imanol 2007-06-01 06:53:04

nun jartzen du hori? ez dut ikusten

. 2007-06-03 14:48:27

Kaixo guztioi. Lehenik eta behin asko pozten gara bertsoak zuen gustokoak direlako. Bestetik, barkamenak eskatu nahi dizkizuegu, bertsoak ez daudelako entzungai. Prestatuak ditugu, baina arazo bat izan dugu. Listo ditugun bezain pronto sareratuko ditugu. Berriro ere barkamenak.

Elisabeth Pombo 2007-06-04 12:58:43

eta ba al dakizue bertsoen doinua zein den?

Elisabethi 2007-06-16 00:16:53

ei aurkitu dut! doinua Iturriagaren "Egun on Euskal Herria kaixo kaixo iepa iepa"

uxuemanoa 2007-06-19 13:57:41

Jada bertsoaren audioa zintzilikatua duzue, Uxuek berak abestua.

Elisabeth Pombo 2007-06-26 14:41:51

Mila esker!

Elisabethi 2007-07-06 14:06:18

Izartxoaz (*) markaturiko datuak derrigorrez bete beharrekoak dira.