Argia astekaria webgunearen hasiera

Datorren hilabetean ekitaldi sorta egingo dute Elgetan gerrako gertaerak gogoratzeko. Egun nagusia martxoaren 25a, igandearekin, ospatuko dute.



Juan Jose Arangurenek Intxortako Atea eskultura egin du eta Euzko Gudarostearen defentsa lerro nagusia zegoen gunean jarriko dute, Asentzioko ermitatik hurbil, Partaitxikin. Ezkerreko argazkian, Partaitxikik orain 70 urte zuen itxura. «Erasoengandik babesten gaituen horma irudikatu nahi izan du» egileak, «segurtasuna eskaintzen duena, ate bat eraikitzeko horma bat apurtzetik jaiotzen dena».



36ko Gerran Elgetako frontean jazotakoen inguruko erakusketa ere egingo dute Espaloia Kafe Antzokian. Gainera Intxortako frontea defendatu zuten gudari eta miliziarrei omenaldia egingo diete herriko plazan; Intxorta erasotu zutenak ere gonbidatuko dituzte. Horren ostean bazkaritara bilduko dira pilotalekuan. 2.000 lagun bildu gura dituzte.



Martxoaren 22an, ekitaldien atarian, Jesus Gutierrezen La guerra civil en Eibar y Elgeta liburua aurkeztuko dute udaletxean.



Eskuinean Intxortako Atea eskulturaren maketa. Orijinala Altzairuzko pieza da eta zazpi metro pasa izango ditu luzean.