Argia astekaria webgunearen hasiera

Euskal mendizaletasunarentzat toki esanguratsurik bada, Elgetako plaza da, zalantzarik gabe, horietako bat.

Elorrio eta Bergara batzen dituen errepidea arku baten azpitik igarotzen da Elgetako sarreran, garai batean arbitrio etxea izandakoaren petik. Udaletxearen eraikina da Elgetako plazako buru eta plaza honetatik osteratxo bat egitea, historian atzera, eta euskal mendizaletasunaren historia sentimentalean barrena bidaiatzea da. Udaletxearen karrerapearen gainean, zenbait plaka dago honako hitz hauek irakur daitezkeelarik: Federación Vasco Navarra de Montañismo, Urrezko Ezteiak, 1924-1974; Federación Vasco Navarra de Montañismo, 1924-1999. Izan ere Elgetako plazaren gaur egungo izena bera «Mendizaleen plaza» da izan (1926an Plaza del Alpinismo izenez bataiatu eta 1978an moldaturiko izena). Udaletxearen parean dagoen Oskarbi Elkartearen aurrealdean, berriz, beste plaka batek toki horretan, 1924ko maiatzaren 18an, Euskal Mendizale Federakundea sortu zela gogoratzen du (Federación Vasco Navarra de Alpinismo, hastapenean).



Elgetako plaza, beraz, mendizale federakundearen abiapuntua da; ordura arteko elkarte txikiak elkartu, helburuak bateratu, eta ekimenak elkarrekin sustatzeko aukera eman zien federazioak. Helburu hori ongi zehaztuta dago ezarri zuten arautegiaren lehen artikuluan:

Baskongadetako hiru probintzietako eta Nafarroako mendi eta txangozaletasun-elkarte guztiak biltzen dituen erakunde komun eta nagusia da, mendiarekin eta txangozaletasunarekin zerikusia duten gai interesgarri guztiak sortu, gestionatu eta antolatzeaz arduratzen dena

.