Argia astekaria webgunearen hasiera

Urteurrenaz gain, Euskadiko Orkestra Sinfonikoa beste gai batengatik ere albiste izan da azken asteetan. Joan den urtarrilaren 22an eskaini behar zuen orkestrak 2007ko abonu denboraldiko lehen kontzertua Donostiako Kursaal aretoan, baina bertan behera geratu zen musikarien greba zela-eta.



EOSeko langileek oinarrizko soldataren igoera eskatzeko egin zuten aipatutako lanuztea, zuzendaritzarekin egindako bileretan akordiorik lortzen ez zutela ikusi ondoren. Afera aspalditik dator, baina joan den urteko urrian langileek hedabideen aurrean egindako agerraldiaz geroztik abiadura hartu du. Ordukoan, soldata igoerarik egon ezean «neurriak» hartzeko prest zeudela adierazi zuten langileek, eta greba izan da norabide horretan emandako lehen urratsa.