Argia astekaria webgunearen hasiera

Noblezia oso antzinatik da ezaguna, eta lurralde askotan loratu izan da. Gaur egun, munduko ia herrialde guztietan noblezia motaren bat dagoela esan genezake, are gehiago «noble» hitzaren esanahirik zabalena hartuta. Hau da, norbait nabarmentzea, biztanle arruntak baino gehiago dela adieraztea. «Sobiet Batasunean ere baziren leinu bereziak. Boltxebikeen heroien ondorengoek aristokrazia antzeko bat osatzen zuten, esaterako», azaldu du Jose Luis Sampedrok. «Eta AEBetan debekatuta daude noble tituluak, baina George Bushen seme-alaba edo enbaxadore familia bateko hirugarren belaunaldiko kidea izatea bada zerbait».



Adibideok bakanak dira hala ere. Herrialde gehienetan tituluak existitzen dira, mota batekoak edo bestekoak, izen batekin edo bestearekin. Asian indar handia daukate noble sailkapenek, Europan baino handiagoa beharbada. Arabiar herrialdeetan, Indian, Japonen... «Herrialde batzuetan, Etiopian berbarako, mendebaldeko sistema hartu zuten, kondeak, markesak eta abar sortuz». Afrika beltzean, oro har, ez dira hain zurrunak, baina hango leinuetan oso antzinatik egon dira hierarkiak eta sailkapenak, eta herrialdeen arteko mugak Europako ereduari jarraiki ezarri zirenean, eutsi egin zioten horri.