Argia astekaria webgunearen hasiera

Argi dago ezin dugula edozein onddo hartu. Izan ere onddo mota pozoitsuak badira eta horietako batzuk hilgarriak ere izan daitezke. Euskal Herrian mikologiari buruzko ezagutza handi samarra delako-edo ez da jende asko pozoitzen behar ez diren onddoak janda. Hori ez da ordea beti horrela izan. Gerra ondorengo urteetan, goseteetan, jende asko hil zen pozoituta Euskal Herrian.



Gaur egun, zorionez, garai haietako premiarik ez dagoenez, jendeak zalantzazkoa izan daitekeen onddorik ez du jaten. Pozoitu gutxi izaten da, eta izaten diren kasuek ez dute sasoi batean bezainbesteko larritasunik. Adituek diotenez duela urte batzuk onddo hilgarriak jaten zituzten hamar pertsonatik zortzi hil egiten ziren; gaur egun, aldiz, zientziaren aurrerapenari esker, pozoitutakoak garaiz hartuz gero, hiltzeko arriskua % 5 - % 10ekoa besterik ez da.