Natxo Zenborain argazkilari nafarrak (www.zenborain.com) Iruñeko Contraluz galerian jarri ditu ikusgai bere irudiak, Ez espero ikustea... Ikustea iruditu zaizuna izenburupean. Erakusketa hilaren 3a arte izango da ikusgai.
Kirmen Uriberen Bitartean heldu eskutik poema liburua ingelesez kaleratu du Graywolf Press argitaletxeak eta iragan astetik AEB eta Kanadako liburu denda nagusietan dago salgai, Meanwhile Take my hand izenburupean. Elizabeth Macklinek egin du itzulpena, euskaratik zuzenean. Bestalde, Andoni Salamero zumarragarrak 60 olerki laburrez osatutako Bide ertzeko printzak liburua kaleratu du. 2004an plazaratutako Zu. Ni. Bi. Bidean... lanarekin bezala, autoedizioaren aldeko hautua egin du Salamerok bigarren liburuarekin.
Koldo Izagirrek, Teilatuko lizarra kantu liburua aurkezteko errezitala eskaini zuen Donostiako Tabako Fabrikan iazko apirilean. Susa argitaletxeak errezitaldiaren audio artxiboak sarean jarri ditu, ondorengo bi web gune hauetan: www.susa-literatura.com eta www.armiarma.com. Izagirrek irakurritako 13 kantu jaso dituzte.
Katarbeltz konpainiak Iker Ortiz de Zaratek idatzitako Las azarosas andanzas de dos pícaras pellejas obra aurkeztuko du hilaren 18an Bilborock aretoan. Hauxe da Katarbeltz taldearen estreinako lana. Urtarrilaren 25ean Gasteizko Principal antzokian eskainiko dute, eta 26an Oñatiko Santa Ana aretoan.
Iñaki Arzoz artistak Diario de Noticias egunkarian: «Nafarroak ez du benetako kultur politikarik izan; elementu multzo baten inprobisazioa eta azpiegiturei dagozkien ekintza oso mugatuak besterik ez. Hainbat aukera galdu dira, besteak beste arte garaikidearen gaiarena. Denbora asko daramagu arte garaikideko zentrorik edo antzeko gauzarik gabe eta Espainiako erkidegoei dagokienez azkenetakoak gara, denbora baita gainerakoak eguneratu direla. Euskal Autonomia Erkidegoak Guggenheim, Artium eta Arteleku dauzka; eta guk ez dugu ezer».
Miguel Alfredo Hernandez 'Zirika' artistak Geu Gasteiz aldizkarian: «Gaur egun, gure (Gasteizko artiston) obrak erakustea gero eta errazagoa dela esango nuke (...) Hala ere, nik uste dut ni bezalako pertsonentzat zailagoa dela, hau da, ez profesional ez hasiberriak garenontzat. Erdibideko gauza falta da. Ez dugu Artiumen erakusketa bat egin nahi, baina ezta kafetegi txiki batean ere. Amarica aretoa bezalako gelak falta dira, esaterako. Are gehiago, bertako artea bultzatzea falta da, antza denez, artea beti kanpotik etorri behar den uste txarra nahiko zabalduta dagoelako».
Rober Vlasco zinemagileak Xirikan: «Orokorrean, kultur batzordeetako arduradunak politiko hutsak dira eta ez diote inolako garrantzirik ematen film ekoizpenei (...) Ez dago aurkeztutako lanak baloratzen dituen komiterik eta beraz kalitatezko lanak aurkezteak ez du jarraipen berezirik (...) EITBn ere ez dira ekoizpen zinematografikoaz kezkatzen. Horiek ere diru partida batzuk bideratzea derrigorrezkoa dute eta egiten duten telebistaren kalitate txarrarekin gertatzen den bezala, ekoizpen zinematografikoarekin ere edozein kaka babesteko gai dira irizpide txarra erakutsiz».
Xabier Agirrek Berrian: «Ni ez naiz hasiko negarrez, baina argi dago hemen ez dagoela estrategia orokorrik, ez behintzat musika alorrekoaren parekoa: kontserbatorio profesionalak, orkestrak... Oso ongi ikusten dut hori. Bakarrik diot antzerkiaren alorrean ez dagoela halakorik, ez dela lehentasuna».
Lege Oharra
RSS sindikazioa 