Argia astekaria webgunearen hasiera

Euskal Herrian, gaur egun antxoaren kasua da arrantzaren egoeraren adierazle nagusia. Hain zuzen, 28 itsasontzik apirila eta ekaina artean antxoaren arrantza esperimentala egitea onartu berri du Europar Batasunak eta oso haserre agertu dira antxoaren arrantza debekatuta duten EAEko arrantzaleak. Bisigua desagertu egin zen gure kostaldetik, eta orain antxoak antzeko bidea darama. Azti-Tecnaliako euskal zientzialariek aholkatu bezalako neurri gogorrak hartzen ez badira -arrantzarik gabeko aldiak luzatzea eta debekualdiak ezartzea, esate baterako-, antxoa ere desagertu egingo da.



1968. urtean Kantauri itsasoan 9.586 tona bisigu arrantzatu ziren. Eta Aztik 1990ean egindako ikerketa baten arabera, 80ko hamarkadaren bukaeran desagertu zen espezie hau. Gaur egun kaxa gutxi batzuk besterik ez direnez arrantzatzen, oso garesti saltzen da. Orain Euskal Herrian jaten dugun bisigua Tarifatik edo Marokotik ekartzen dute.



Orain dela berrogei urte Kantauriko arrantza ontziek, Euskal Herrikoek barne, 80.000 tona antxoa harrapatzen zituzten kanpainako. Azken kanpainan, harrapaketak ez ziren 800 tonetara iritsi. Hego Euskal Herriko harrapaketetara mugatuta ere, errealitatea ez da baikorra, beheko grafikoan ikus daitekeenez. Enpleguarentzat, halaber, gogorra izan da: EAEko baxurako arrantzan 4.146 lanpostu zeuden 1988an eta 1.728 besterik ez 2005ean.



Europako Ingurumen Agentziak eta Itsasoa Ikertzeko Nazioarteko Kontseiluak Espainiako Estatuari buruzko datu gehiago eman dituzte, Hegoaldeko datuak barne. Hona hemen datuok: legatz harrapaketak 16.000 tonatik 7.000 tona baino gutxiagora jaitsi dira hogei urte baino gutxiagoko epean. Kantauri itsasoan legatzaren arrantza debekatzeko ahaleginak egin ziren 2004an, baina alferrik. Berdin gertatu da zapoarekin: zientzialariak 2004tik ari dira kala ixteko eskatzen, harrapaketak 1987ko 10.000 tonetatik gaur eguneko 3.200 tonetara jaitsi baitira. Zigala kopurua ere murriztu egin da; 2002an zientzialariak zigalaren arrantza debekatzea komeni dela esaten hasi ziren arren, oraindik ere jarraitzen dute zigala harrapatzen.