Argia astekaria webgunearen hasiera

Hernaniko (Gipuzkoa) Iraulio Panttalonek urtero bezala bertso astea egingo du, abenduaren 20tik 31ra artean. Aurten 25 urte bete dituzte bertso eskolek (tartean Hernanikoak), eta hori izango dute hizpide Xabier Amuriza, Juanjo Uria, Itziar Eizagirre eta Mikel Mendizabalek abenduaren 22an egingo duten mahai-inguruan. Abenduak 27an, berriz, Maialen Lujanbio bertsolariak eta Judith Montero saxofoijoleak, hitzak eta hotsak lotuz prestatutako emanaldiaren estreinaldia entzun ahal izango da. Gaztetxoentzat saioa, kale-antzerkia, Urte Zaharretako erronda eta beste hainbat bertso ekintza izango dira kalez kale.

Juan Crisostomo Arriaga jaio zela bi mende dira aurten. Ospatzeko hainbat ekitaldi antolatu ditu Bilboko Udaleko Kultura eta Euskara Sailak. Urtarrilaren 14ra arte Zabalgune egoitzan ikusgai den erakusketak emango die bukaera ospakizunei, eta ginda berriz, Botxo Boogies bandak urtarrilak 4an Zabalgune egoitzan bertan emango duen kontzertuak jarriko du. Kontzertuan Arriagaren piezak joko dituzte, baina jazz, bals, bolero, samba eta funk estilora eramanda. Jadanik ikusgai den erakusketan Arriagaren partituren faksmileak, horiei buruzko iruzkinak eta musikariaren erretratu bakarra daude, eta gune interaktiboan bere piezarik ospetsuenak entzun ahal izango ditugu. Udalak talde eta eskolentzako bisita gidatuak jarri ditu.

6.146 metro koadroko eraikina altxatzen ari dira Uharte Arakil (Nafarroa) sarreran. Lau solairu izango ditu, eta Pedro Ordoñezek, zentroko zuzendariak jakinarazi zuenez, ez da museoa izango, artisten lantegi, erakustoki eta kultur etxeen arteko nahasketa bat baizik. Lau ildo izango ditu: erakustokia, ekitaldiak, ekoizpenak eta trebakuntza. Bertako eta nazioarteko arteak izango dute lekua, eta 2008ko udan, bi urtez behingo nazioarteko topaketak egiteari ekingo diotela aurreratu dute. Sei lagunek osatzen duten patronatuak kudeatuko du zentroa eta arte irizpideak bost adituk sortutako aholku batzordeak emango ditu.

Patxi Gaztelumendik blogean (www.gaztelumendi.org): «Euskara gutxiengo izaten ari da, euskal liburu eta disko azokan ere. Eta ez da ezer pasatzen, ez dago krisi berbarik horregatik. Izan ere, gehiago saltzen du erdarak, hain gaude salduak. (...) Durangoko azoka, izenburu berria. Ez euskal, ez liburu eta ez disko. Durangokoazoka.com Feriaderurango... libre daukate».

Bernardo Atxagak Noticias de Gipuzkoan: «Barojak herrikoiarekiko zuen sentiberatasuna benetan ezohikoa zen bere mailako jendearengan: Donostiako ingeniari baten semea, hiriko gizona, Madrilen ibiltzen zena... Bere klaseko jendeak, normalean, mespretxatu egiten zuen herrikoia zen guztia, eta beraz, euskal mundua».

Natxo de Felipek Deian: «Publikoaren esku dago Oskorri noiz arte biziko den. Atea ixten badigu, erretiroa eskatzen ari zaigu. 40 edo 50 urte betetzen baditugu, pozik egongo gara».