Jexux Mari Irazu
Doinua: «Lagundurikan danoi II», «Espainian behera» edo «Batetikan korroxka».
I
Askoren adiskide
ez soilik bezero
irrati, telebistan...
prentsan egunero
duela gutxi arte
ia Olentzero
lehen lagun nituenak
orain izu, ero
nerekin a ze amets
gaiztoak gauero.
II
Ezagutu berritan
rollo bat naiz, utzi
laster etxekotzen naiz
azkure ta imurtzi.
Gaur gizon kutsukoa,
igoal eme etzi
puntu femeninoa
badut, ez da gutxi
baina aspaldi ez zait
hilekorik jaitsi.
III
Gaztea beti gazte
omen da gaztetan
ezin omen fijatu
unean bestetan.
Nola edertasuna
udaberri bueltan
ni aukeratzen naute,
berrogei urtetan
aldatuko ez naizen
itxaropenetan.
IV
Ez, mailegua ez naiz
bestela ze fama!
Baina hor bueltan nabil,
hor nonbait, hor barna.
Nik daramat kargaren
neurriaren zama.
Izan nuen garaia
-betiko joan dana?-
diruak ere burla
egiten zidana.
V
Aldakorra naizela
ta, zenbait aztora
gaurko zuen munduan
fijo zer dago ba?
Europako bankuen
eztirako lora
bi pausoko zera naiz
behera gisa gora:
poltsikotik gerrira
gerritik lepora.
VI
Puntu eta dezima
bertso senekoa
Europe Interbank Offered
Rate izenekoa
lagunentzat Euribor,
etxe onekoa
ni naiz 0,5-aren
aldamenekoa.
Ezagutze ez banauzu
zorionekoa!
Lege Oharra
RSS sindikazioa