Argia astekaria webgunearen hasiera

Nire gogoan elizari baino kantuari lotua. Xuberotartu azkaindarra duela hogeita hamabost bat urte ezagutu nuen kantuz, bere apaiz izateaz harro. Hegoaldekoak bertakotzeko ahaleginetan ikusten nuen beti, bere osaba Sokoako erretorearen bidetik. Eta hara non, beste Roger Idiart batek erakutsi digu errealitate baten gordina. Hau Amikuzeko semea, etxegintzan langile, kostaldera jina bizibide xerka. Beste hainbeste bezalaxe promotore baten zepoan eroria, gose grebari ekin behar izan dio tratuaren ordaina eskuratzeko. Lana latz egin, bere lankideak ordaindu eta bera deus gabe utzi duenak bapo hornitua darrai. Bi gehi bi erostean hiru eta saltzean hamabi sistema onartuari honek erosteari zero ezarri dio, besteren bizkar bildutakoa gutxi zelakoan. Eta gehienetan bandida hauek garaile ateratzen direnez, lasai arraio egiten dituzte kontratuak deus ez dutela beteko jakinez. Eta han eta hemen xantierrak dituztenez, amen batean aberastu egin zaizkigu sekulako arrakasta bilduz inguruan. Rogerrek erakutsi die bidea bera bezala dabiltzanei, egindako lanen ordaina eskura ezinik dabiltzanei. Identifikatu behar dira bandidak eta artxibatu, jendarteak jakin dezan beren ondasunak ez dietela bere talentuari zor. Bandida honek Xabier Gantois du izena.