Argia astekaria webgunearen hasiera

Eibar Kirol Elkarteko Euskara Batzordea orain bi urte sortu zuten Moises Gonzalez eta Fernando Muniozguren zenak. Ezer baino lehen plan estrategikoa gorpuztu zuten. «Konturatu ginen jende gazteak bazkideen erdia osatzen zuela gutxi gorabehera. Eta aintzat hartuz Eibarko ikasleen %95 inguru D ereduan ari dela, euskara futbolean txertatzeko ahaleginean hasi ginen», azaldu digu Moises Gonzalez Euskara Batzordeko kideak. Plan estrategikoari helduta, diagnostikoa osatzeko Eibar herriko zein klubeko euskararen ezaugarriak landu zituzten, hala nola, paisaia linguistikoa, ahozko eta idatzizko harremanak eta euskararen erabilera maila.



Diagnostikoa egin ostean, helburuak finkatu zituzten. Hasieran, helburua kanpo nahiz barne funtzionamenduan, modu mailakatu eta progresiboan, euskararen erabilera normalizatzea izan zen. Ondorioz, Eibar taldearen pean guztia egiten da bi hizkuntzatan. Bestetik, klubeko jendearen ahozko harremanetarako profila aztertu zuten: Eibarko entrenatzaile gehienak euskaldunak dira. Horren harira, aurtengo plana eratu zuten: taldeko ume eta gaztetxoek euskaraz egitea entrenamenduetan. Kontua zen, entrenatzaileek, nahiz eta euskaldunak izan ia denak, ez zutela futbol terminologia menperatzen, eta ikastaroak antolatu dituzte euskarazko terminoak ikasteko. Gonzalezen iritziz, «zuzendaritzaren mezua ere aldatu egin da. Ikastaro horiek ez dira nahi dutenentzat, ez dakiten guztientzat baizik, hau da, ez badakizu ikastarora joan behar duzu». Alegia, ez dela borondatezkoa, beharrezkoa baizik.