Argia astekaria webgunearen hasiera

Bost urte eman ditugu zirkuitu itxi eta mugatu batean, eta orain bizitakoa erakusteko aukera dugu. Neurri batean gure buruei eman nahi diegu ahotsa. Eta bestetik, eduki horrekin identifikatzen den orori. Horregatik saiatu gara mamia bakarrik azaltzen, entzulearekin bat osatu beharreko ekarpen bat delako.

Esan ohi dugu musikak kutsu terapeutikoa duela guretzat, eta atera beharrekoak kasu honetan nahiko negatiboak izan dira. Batzuk esperantzaz beterik daude, beste batzuk zuloan sartzen gaituzte edota erdibidean gelditzen dira. Garrantzitsua da onartzea gauzak beti ez direla zertan ondo amaitu behar.

Gure lehen grabaketa izan da eta oso gustura gelditu gara, bai guk egindakoarekin eta, batez ere, Natxo Libertyk emandakoarekin. Urte asko darama musikan buru-belarri sartuta. Urtebete inguru ibili zen lokalera etortzen materiala lantzen, eta falta genuen esperientzia eman digu. Horrez gain, estudioan lan izugarria egin du.

Guretzat ezinbesteko triangelua indarra, intentsitatea eta jarrerak osatuko lukete. Melodia itsaskorrak ezinbesteko baino gehiago, garrantzitsuak dira, eta gure kasuan berezkoak zaizkigu.

Gure inguruan etengabe gertatzen dira horiek. Ezagutzera emateak anonimotasuna eta dramatikotasuna kentzen die, beraz aukera zaila da. Bakoitzean merezi ote duen erabaki behar dugu. Gure asmoa hor daudela eta besteak bezain beharrezkoak direla ohartaraztea da.

Gatikako laukote honek estraineko lana kaleratu du Baga-Biga diskoetxearekin. Aurretik inolako maketarik kaleratu gabe, Natxo Libertyren gidaritzapean hamar kantu dotore jarri dizkigute entzungai. Kantu gehienek metal oinarria duten arren, Dut, Helmet eta antzeko post-hardcore taldeen intentsitateak arrasto handia utzi du konposizioetan. Taldeak hanka bat metal eta thrash ildotik kanpo dauka eta horrek emaitza aberatsagoa egiten du. Are gehiago, honako hau beraien lehenengo lana izanik denbora luzean grabatutako kantuak eta gogoetak batu dituzte eta, besteak beste, pop-rockaren, stonerraren edo rock-and-roll gitarreroaren ukituak ere antzematen dira. Galtzaileen eta pertsonaia anonimoen istorio, ezinegon eta gogoetak, barru-barrutik irtendakoak, kanporatzeko baliatu dituzte kantuen hitzak.