Argia astekaria webgunearen hasiera

Joxe Portela Ibaiako lehendakariak adierazpen hauek egin zizkion Berriari: «Badirudi beti eskatzen ari garela, baina azken batean politikari guztiek, eta partidu politiko guztiek, diote ikus-entzunezkoen arloa estrategikoa dela herri bat aurrera eramateko. Guk hori betetzeko baino ez dugu eskatzen».

Aurelia Arkotxa idazleak Garari esanak: «Berant hasi naizen edo ez naizen hasi, edo halakoak liburu bakarra idatzi duen edo... Niretako horiek ez dute kontatzen. Horiek dira euskal literaturaren barrenean egiten diren kontuak. Zilborraren inguruan ibiltzea (...) Niretako publikatzea ez da inportanteena. Mementoa heldua dela senti ez badut, ez dut publikatuko (...) Gure mendebaldeko gizartea alderantzizkoa da. Dena da laster egitea, dena da hedabideetan agertzea, argazkiak... Idaztea da autopromozioa, saltzea...».

Jose Angel Uberuaga Ube eskultorea Deian: «Eguneroko lanak ematen du izena, inondik ere. Sariak bizkortu egin dezake prozesua. Eguneroko lanak berez dakar emaitza. Egia da denek ez dutela gero emaitza bera lortzen. Baina lana, lana da eta hori ulertzera iristen garenean emaitzak hor izango ditugu zain. Sariei begira egoteak frustrazioa baino ez dezake ekar, bestalde».