Argia astekaria webgunearen hasiera

Sailkapen estropada amaituta, badoa Gorka Aquariumeko eskaileretan gora. Hamalaugarrenak izan dira erdi ilunpetan egin behar izan duten estropadaren amaieran, eta, ondorioz, urteko helburu nagusitik urruti geratu dira. Egun luzea izan da, eta seko nazkatuta dago. Lantegiko arduraduna muturtuta utzi du, lan boladatxoa izan arren, dena utzita eguerditik aurrera Donostiaratu behar izan duelako. Haserre da estropadaren antolatzaileekin, arraunlariak kontuan hartu gabe, uretako lana bi ordu luzez atzeratu dutelako. Haserre, politiko jendearekin, arrazoiarekin edo gabe, ezagutzen ez duten uretan muturra sartu dutelako, etekin politikotik edateko. Eta haserre, esker txarreko kirol honekin.

Sailkapen estropada amaituta, neguko entrenamenduak datozkio gogora: euritan, hotzetan, ilunpetan, deskantsuari lapurtutako orduetan. Eskuak eta ipurdia, larrututa eta odoletan. Une horretan, eskaileretan behera irrati gizona dator, ibili ahala entzuleei egoeraren berri emanez, kanoiaren aurrean geratu den arte, arnasotsak kontatu beharrekoa oztopa ez dezan:

«...Jakin badakizue Astillerokoek uko egin ziotela iaz Hondarribian Jaurlaritzatik agindu zien dopinaren aurkako kontrola pasatzeari. Harritzekoa ez, bestalde, agindu hura, kontuan izanik kolpetik hamasei arraunlarik eskatu zutela baimena bronkodilatadoreak erabiltzeko, eta Astillerok ez zuela arraunlariek sinatu zuten kode etikoa TKEra igorri, euren kideei aurre eginez, uste zutelako Kantabriako Gobernutik jaso beharreko diruak haien haserrea goxatuko zuela... Gogoratu, gainera, Hondarribian gertatuaren ondorioz ipinitako isunak ordaintzeke daudela eta, Jaurlaritzak ez diela parte hartzen utzi nahi De Franciscoren mutilei... dena den, ordaintzeko epea oraindik amaitu ez dela-eta, alkateak epailearen erabakia onartuko duela, beti bezala... eta federazioek Astillero tartean bada ez dakitela estropada zuzenduko duten. Baina, dena den, lehorreko epaile lehor batek erabaki duela ez dagoela kantabriarrak kanpoan uzteko motiborik... bueno bai, baina agian ez, edo akaso bai... Eta hondarribiarrek ez dutela kanpoan geratzerik merezi... eta Astillero uretara hondartzatik sartu dela, trainerua pisatzeko betarik gabe... eta ikusleek drogazaletzat jo dituztela San Joseko arraunlariak eta patroia arranplan sartu direnean...».

Kanoiaren aurrean, elkarren aurrez aurre, irrati gizonak ez du ikusi ere egin mela-mela eginda autobusera doan kirolaria, eta bere etorria amaitu ezina bailitzan segitu du.

Arraunlariak pentsatu du pena ikaragarria dela kanoi zaharrak indarrik ez izatea, azken tiroa egin eta inguru guztia isiltasun ederrenean hondoratzeko.

(...) Gorka igande eguerdian telebista aurrean jarri da eta Castroren garaipena ikusi du emozio handirik gabe. Egun bateko eta biko markek ere ez dute bere onetik atera. Ilusioa lapurtu diote eta arraunlariak batuko ote diren ere ez du oso garbi. «Zuentzat, oso-osorik», pentsatu du. Bitartean irrati gizonak eztarria galdu du ulertezina argitu nahian. Kirola izan omen da benetako garailea. Tururu!

Azken asteotan krisiaz eta blokeoaz ari gara prozesuaren inguruan mintzatzen garenean. Batasunak aipatu zuen blokeo egoeraren berri, beste alderdi batzuk (PNV eta PSOE) prozesuaren osasun onaz mintzatzen ziren bitartean. Ez da ona, ordea, prozesuaren osasuna. Sei hilabete eta gero, prozesuak ezagutu zezakeen eszenatokirik kaxkarrenean gaude.

Hau da egia, hainbat aurrekarik besterik adierazten bazuten ere: Zapateroren adierazpena izan zen esanguratsuena, euskal herritarren erabakia errespetatuko duela aitortuz Batasunaren harrera beroa izan zuena; eta PSE-EErekin bilkura publikoa izan zen sonatuena. Ezker Abertzaleak prozesuaren garapenerako baldintza objektiboak bazirela aipatu zuen gertakari hauen harira eta alderdi politiko ezberdinekin bildu ostean.

Baina bi urrats horien ondotik, alderdien mahaia martxan jartzeko akordioa osatzera gindoazela, kale egin zuen alderdi sozialistak. Alderdien mahaia «ahaztu» eta oporretarako bidea hartu zuten sozialista buruzagiek, Ezker Abertzalearentzat Entzutegi Nazionaleko «zigorra» utziz.

Alderdien Mahaiaren ordez, Garzonen «mahaia», baldintza berriak, mehatxuak... eta arazoa, nonbait, Ezker Abertzalea tematu egin dela legalizazioaren inguruan. Horrela saldu dute sozialistek prozesuaren egoera, ordutik hona, beren ardura osoa gainetik kendu nahian.

Gauzak honela, Ezker Abertzaleak zuhurtziaz, tinkotasunarekin eta pazientzia handiz jokatu du orain arte, gatazkaren konponbidearen aurkako norabidean gainera «etorri» zaizkion hamaika erasoren aurrean zailtasun guztiak gainditze bidean jarri asmoz.

Eta borondate osoarekin. Izan ere, gatazkaren konponbidean aurrera urratsak emateko garrantzitsuena ez da besteari zer eskatzen zaion behin eta berriro errepikatzea, norbera zertarako prest dagoen adieraztea baizik. Ezker Abertzaleak bere borondatea zein den argi uzten duten konpromisoak adierazi eta urrats zehatzak eman ditu, Anoetako proposamenetik hona eta ETAren suetena tarteko.

Aldiz, PSOEk gatazkaren konponbiderako beharko lukeen prozesuaren norabidea eten, beste norabide batean kokatzen saiatu -bake prozesu «teknikoan»- eta amildegi ertzera eraman du prozesua. Eta PNVk une oro jakin du gauzak zertan diren, alderdi jeltzalea sozialisten arrastoari jarraikiz aritu baita. Hauxe guztia da blokeoaren gakoa.

Blokeoa gainditzea izan behar du orain gure ardura, mahai baten bueltan gatazkaren korapiloak, autodeterminazioa eta lurraldetasuna, guztion artean askatzeko bitartekoak jarriz. Horretan ari da lanean Ezker Abertzalea. Eta PSOE? Eta PNV?