Kepa Junkera trikitilariak Hiri diskoa plazaratu du Elkar argitaletxearen eskutik. Hiri imaginario bat dute ardatz diskoko hamabost kantuek, non kulturek elkar ulertzeko ahalegina egiten duten.

Jorge Oteizaren poesiaren edizio kritikoa kalean da: Poesia. Elebiduna da Jorge Oteiza Fundazio Museoak atondutako argitalpena. Pello Zabaletak eta Jose Luis Padronek euskaratu dituzte poesiak eta Felix Marañak eta Gabriel Insaustik, besteak beste egin dute haien irakurketa kritikoa.

Txalo teatroak Yazmina Reza idazlearen Arte antzezlan entzutetsua estreinatuko du euskaraz, hilaren 22an Tolosan. Joseba Apaolaza, Ramon Agirre eta Asier Hormaza dira obrako hiru lagunak gorpuztuko dituzten aktoreak.

Ane Muñoz zuzendariak Loturak film laburra errodatu berri du. Jokoagatik familia eta lagunak galtzen dituen gizonaren istorioa kontatzen du filmak. Anartz Zuazuak eta Ane Aseginolazak jokatu dituzte rol nagusiak. Muñozen aurreko filmeetan bezala, Fermin Muguruzak sortu du filmeko soinu banda.