Ikasturte berria

badator ta zelan!

Aulkiak gertu daude

berriz ikasgelan,

arbela zuritzear,

eskola bete plan.

Arkatz, liburu, goma,

guraize, idazlan...

ahaztu gabe «uda»

sartzea motxilan.

Maten hau esango du

lehenengo galderak:

-Madriletik Kubara

doa hegazkin bat,

500 kilometrora

minutuak zenbat?

-Segun zenbat dirauen

Iberiako grebak,

hori ez daki ezta

pilotuak berak!

Euskarako maistrak

esango du sendo:

-«Mikel etxera doa»

perpausa lehenengo,

zein den subjektua inork

ez al dit esango?

-Nahiz ta kasua zein den

ez jakin hain ondo,

ziur nago ez dela

presoa izango.

Geografiarentzat

heldu da denbora.

«Mapan kokatu Israel»,

lehenengo aproba:

-Israel beti Israel

izan da, señora,

baina pasatzen dabil

marratik kanpora

eta laster Libano

ere izango da.

Soinketako klasea

hasiko da berriz

bere salto, flexio

eta korrikaldiz.

-Eman kantxari buelta

hogeita bost aldiz!

-Listo! -erantzungo du

ume batek irriz...

-Ez zinen komunetik

pasatuko, Landis?

Historian Kuba da

azken azalpena,

Gizarten mahai falta

da sumatzen dena,

Naturren badago ke

usain nabarmena...

Argi ikus daiteke

eskolan barrena

Mundua dela denon

ikasgai zailena.