Argia astekaria webgunearen hasiera

Calparsorok Heinkel 111arekin erasotzen zituen lubakietan, Alcubierren eta Huescan, arrastaka ibili zirenek, denek, sufritu zituzten zorriak. Baita George Orwellek ere Homage to Catalonian dioenez: «Verdunen, Waterloon, Flandesen, Senlacen edo Termopiletan borrokatu ziren gizonek, horiek denek zorriak zituzten barrabiletatik arrastaka. Gai honetan eskarmentu handia dut eta esan dezaket zomorro nazkagarri hori ezagutzen den beste ezer baino ankerragoa dela. Uste dut bake zaleentzat ona litzatekeela beraien idatziak handitutako zorrien irudiekin ilustratzea. Gerran guztiok genituen zorriak». Umore fin ingelesez idatzitako lerrook ez dira zuzen-zuzenak, Calparsorok argitu digunez: «Egunero hil nazaketen, egia da. Baina ondo hilotz garbia topatuko zuketen, ni egunero dutxatzen nintzen eta; ez lubakietan arrastaka zorriz eta lokatzez beteta zebiltzan gizagaixo horiek bezala». Izan ere, hegazkin pilotuak aparteko kasta izan ziren Gerra hartan ere. «Piloturen bat hiltzen bazuten han agertuko zen egunkarietan heroien pare; lubakietan hiltzen denaz ez da inortxo ere akordatzen. Denak berdinak ginela Gerran, gezurra galanta! Ezta hurrik eman ere!».