Bazentozela... bazentozela...

Ametsaren oihartzuna.

Ez zatozela... ez zatozela...

Amets-gaiztoak dioskuna.

Bihotzean hain hurbila eta

zentzunean hain urruna...

Iraganeko gudateak zu

bazaitu etorkizuna

herria ezin ulertuz dabil

zer den itxoiten duzuna.

Mila tiro hots entzun dituen

herri batekoa nauzu...

Ah, bai, barkatu, hasieratik

aurkeztu ez banatzaizu:

Ni Herio naiz, bertan jaioa,

dela hamarkada batzu.

Gaur zaharkitua nagoela ta

Herriak nahi omen du 'Zu',

baina oraintxe nahi zaitu eta

berandutzen ari zaizu.

Badakit zure agenda dela

hutsunerik gabekoa,

ordea, urtez urte atzera

uzten duzu hemengoa.

Urratsak behar zirela eta

emana da lehenengoa;

gainera zure kuleroei so

jarri duzu gehiengoa.

Aurten berria lehenengo aldiz

edo berriz lehengoa?

Sarri bortxatu izan zaituzte

Amerikan zein Afrikan,

alde haietan bisita egin

izan diezun alditan.

Umetan uste nuen zu izan

nahiko nuela haunditan...

Orain haunditu eta izan dut

zure ipurdia bistan...

Ulertzen dizut ez izatea

etortzeko gogorikan.

Baina badakit arriskatzea

duzula zurezko dohai,

egin duzula aunitztan eta

eginen duzula nohiznahi.

Eginen dizut toki bat nere

etxean, etorri lasai!

Nik aurkeztuko dizut herria

ta gizartea ere bai;

ta ongi hartzen ez bazaituzte

ni edukiko naute zai.