Diskoak
Leihotikan: «Nerabeak asko identifikatzen dira hardcore melodikoarekin»
|
2049. alea
2006-07-16 |
0
0
Hardcore melodikoak oso gogor jo zuen Euskal Herrian 90eko hamarkadan, baina halako oso talde gutxi sortu da.
Ez zen islatu taldeetan eta ia ez dago euskarazkorik. Musika estilo honek oso jarraitzaile fidelak ditu, baina hemengo taldeak ez dira kanpokoak bezala tratatu, agian konplexu asko ditugulako. Gaur egun zaharkitutzat hartzen da eta beste estilo batzuetara jotzen da.
Batzuek diote hardcore melodikoa, batez ere, nerabeendako delaą
Ez dugu uste musikak adin konkreturik duenik, baina bizitasun handiko musika da eta nerabeak asko identifikatzen dira hardcore melodikoarekin. Horrek ez du esan nahi azalekoa denik, heldutasun handiko letrak egiten dituzten talde asko daude.
Melodiak protagonismoa izatea ezinbestekoa da?
Melodia gure kantu gehienen ardatza da. Saiatzen gara ahalik eta ongien egokitzen musikari edo hitzei. Baina ez dugu uste ezinbestekoa denik hardcore edo punk rock kantuak egiteko.
Hardcorea askotan da existentzialista eta kritikoa, baina umorea ere barra-barra daukazue.
Zerbait adierazten saiatzen gara: sentimenduak, salaketaką eta topikoetatik aldentzen. Inguruan gertatzen denaren gainekoak dira, gure bizitzetan oinarritzen dira. Helburua da zure barrura eta ingurura begiratzera eta hausnarketa egitera bultzatzea. Gizartea, gizakia, maitasuna, euskara...
Laugarren diskoa duzue. Zein bilakaera izan du taldeak?
Musika estiloan aldaketa nabarmenik ez dagoen arren, orain gauzak askoz argiago ditugu, batez ere grabatzeko eta konposatzeko orduan, eta askoz hobeto jotzen dugu. Hasi ginenean ez genuen pretensio handirik, baina gaur egun taldeak eta musikak bizitzaren alde garrantzitsu bat betetzen du.
Iluntasuna goraipatzen al duzue?
Kantu baten izenburua da. Iradokitzailea dela uste dugu. Batzuetan zenbat eta gutxiago jakin zerbaiten gainean, orduan eta zoriontsuagoak izaten gara.
* * * * * * * * * * * * * * * * * *
Ilunago, ederrago
Leihotikan
Gor diskak
Iraupena: 41' 11''
11,45 euro
Melodiaren eta abiaduraren bizirauleak
Orain dela 15 urte askok ez zuten uste hardcorea melodikoa izan zitekeenik, baina AEBetatik etorritako doinuek posible zela egiaztatu zuten. Horren errua batez ere Bad Religion, NOFX, Pennywise eta antzekoek izan zuten. Euskal Herrian Jabi Saiesek gidatutako Ezin Izan izan zen aitzindaria, eta oso talde gutxik jarraitu du haien bidea. Leihotikan iruindarrek 10 urte bete dituzte eta honako hau laugarren lan luzea dute. Melodien protagonismo handia eta kantu azkarrak diskoaren oinarria diren arren, badira bestelakoak ere: punk-rocka (Zain), hardcore gogorragoa (Baztertua, Plastikozko izar berriak) edota pop-rocka (Ilunago, ederrago), adibidez. Baita Ezin Izanen No oirįs abestiaren bertsioa ere. Hitzei dagokienez, nahikotxo landu dituzte eta pentsarazi, amorrarazi eta barrea eragin diezazukete.
Iruzkina idatzi
