Argia astekaria webgunearen hasiera

Espainiako Estatuko gazteen artean 15,9 urtera jaitsi da sarketan hasteko batez besteko adina, bai mutilen kasuan eta baita nesken kasuan ere. Duela 3 urte 17 urtekoa zen batez besteko adina, Daphne Taldeak 15 urtetik 24ra bitarteko 2.015 gazteen lagin batekin egin duen Sexualitateari eta Antikontzepzioari buruzko II. Schering Inkestak dioenez.

Inkestaren emaitzak jendaurrean ezagutzera emateko egindako prentsaurrekoan, Carmen Coll ginekologoak esan zuen bezala, "egunetik egunera beherantz doa harreman sexual osoen hasierako adina". Inkestak nabarmen jartzen du gure herrialdeko gazteak gero eta lehenago agertzen direla sexualki aktibo, eta sexuan gero eta azkarrago hasten direla.

Bikotearen egonkortasunari dagokionez, bi talde nagusitan banatzen dira gazteak. 20 urtetik 24ra bitarteko gazte gehienek aitortzen zuten beren bikotea bera zela, azken sei hilabeteetan behintzat. Horrela, bikotekide berarekin urte-erdia baino gehiago zebiltzala esan zuten nesken %75,7k, eta mutilen %51,2k. Adin gazteagokoen artean, berriz, 15-19 urteko mutilen kasuan, bikotekidea sei hilabetez bera zutela esan zuten %30,6k, eta % 31,2k hilabete bakarrez besterik ez.

Ikerketak adierazten du, halaber, gazteek metodo antikontzeptibo eraginkorrak ezagutu eta erabiltzen dituztela, baina gazteen herenak aitortu zuenez, ez omen zuten preserbatiborik erabiltzen beren harreman sexual guztietan -"ustekabeko harremanak" izateagatik, edo "alkohola edan ondoren, diskotekatik irten eta une hartako euforiagatik", esaterako-. Gazteen artean preserbatiboa da metodo antikontzeptiborik erabiliena, eta horren atzetik datoz pilula, coitus interruptus delakoa (atzera martxa), eta baita metodo bikoitza ere: bai mutilak eta baita neskak ere neurriak hartzea. Metodo bikoitz hau oso arrunta omen da Holanda bezalako herrialdeetan, Coll doktorearen hitzetan, eta horrek ikaragarri jaisten du nahi gabeko haurdunaldien arriskua.

Azkenik, ginekologoak argi utzi zuen nahi gabeko haurdunaldien eta abortuen kopurua gorantz doala, eta zifra hori altuagoa dela neska zaharragoetan, gezurra badirudi ere, duela 3 urte egindako lehen inkestarekin alderatuz.