Joseba Beleztena Electric Child (lehen gitarra), Julen Irazoki Juzz Suicide (gitarra erritmikoa), Inaxio Agara Loverman (bateria), Xiker Salaberria Freezer (baxua) eta Mikel Larratxe Mike Strangelove dira Sexty Sexers taldeko partaideak. Boskotea nafarra dela esan daiteke, Berakoa. Larratxe abeslaria Irungoa bada ere, familia baitu Beran. Bertan jaio eta hazi da taldea, Aduanako entsegu lokaletan.

Banda gaztea izan arren, aspaldiko rock taldeak dituzte gustuko. UFO, Guns&Roses, AC/DC, Gluecifer eta Black Sabbath bezalako taldeen diskoen izenak irakur daitezke beraien webgunean. Ez dira ez erreferentzia txarrak. Gustu horren erakusle da diskoan egin duten moldaketa bakarra, The Yardbirds-ek 65ean ezagun egin zuen Gouldman-en kanta mitikoa, Heart full of soul. "Hamar bat urte nituela asko maite dudan lehengusu batek Guns&Rosesen disko bat erakutsi zidan, orduan momenturik onenetako batean zegoen taldea eta niri izugarri eragin zidan. Garai hartan Use your illusion diskoa erosi nuen eta shock bat izan zen niretzat. Ez musika aldetik bakarrik, Dragoi Bola ikustera ohitua dagoen mutiko batentzat diskoa zabaldu eta kalaberak eta neskak titi bistan ikustea izugarria zen", diosku taldeko abeslariak, Mikel Larratxek. Eragin hauekin eta rocka bizi duten moduan erreparatuz, taldearen kontzertuak ikusteko modukoak izango dira eta lerro hauek idazten diharduenak ikusi ez baditu ere, badu taula gainean duten jarreraren berri.

Sexty Sexersen estreinako diskoa bost urteko ibilbidearen emaitza da. Hamaika kantaz osatutako lana Andoaingo Garate estudioetan grabatu dute Martxel Arkarazorekin. Nahasketez eta masterizazioaz, berriz, honen aita, Kaki Arkarazo arduratu da. 60ko eta 70eko hamarkadetako rock taldeez gain, 90eko hamarkadakoek ere eragin dietela onartu du Larratxek: "Tool, Soundgarden edota Alice in Chains bezalako taldeek bere garaian harrapatu egin ninduten. Oso kontziente izan gara rocka aspalditik egiten denaz. Horregatik, beti izan dugu gustatzen zaizkigun taldeek zer entzuten duten jakiteko grina. Gaur egun, adibidez, zaila da gazte batek Led Zepellin entzutea. Diskoak merke ditu, baina medioetan ez da entzuten. Nik, adibidez, Toolek No quarter kantaren bertsioa egiten zuelako ezagutu nuen Led Zepellin. Beraz, gero arakatzen hasi eta atzera egitean sekulako harri bitxiak aurkitzen dira", azaldu du Larratxek. Argi dago bai Euskal Herrian eta bai nazioartean ere gero eta rock&roll banda gehiago dagoela. Dena den, Larratxek ez daki zein punturaino den moda edo benetako loratzea: "Zikloak izaten dira, beraz ez dakit. Gainera, ez da moda musikala bakarrik. Arropa dendetako eskaparateetan pintxodun gerrikoak ikusten dituzu, tatuajeak, piercingak eta abar. 90eko hamarkadan horrelako gauzak eskandaluak ziren, eta gaur egun hamabost urteko neskatxa batek ipurdian egiten du tatuajea. Beraz, ez dakizu benetan moda bakarrik den edo ez".

Iluntze berri baten bila estreinako lan honetan hainbat kolaborazio izan dituzte. Surfin´ Kaoseko Koldo Soretek, Morau-ren taldean gitarra jole gisa dabilen Beñardo Goietxek eta Pettik Bera rock city kantan abestu dute eta Joxeviskyk koroak sartu ditu Berriz galdetuko diat (are you ready?) eta Ipurdi bustiak kantetan.

Taldeko abeslariak egina, diskoaren azalari Thin Lizzyren Jailbreak albumaren tankera hartzen diogu, 70eko hamarkadako ukitua duena eta oso rockeroa. "Beti gustatu izan zait komikiaren mundua. Dena guk egitea gustuko dugu, diseinua nik egin dut eta bideoklipak nire anaiak egin ditu, web orria ere guk egin dugu, kartelak...", diosku Larratxek.

Disko berria grabatu baino hilabete batzuk lehenagora arte Ameba izena zuen Berako boskoteak. Baina zelula horren izena ezaguna omen da munduko hainbat talderen artean. Izan ere, banda nafarra horrela bataiatu eta hilabeteetara izen bera zuten atzerriko beste talde batzuen berri izan zuten. "Erromako tipo baten e-mail bat jaso genuen beraiek ere Ameba izena zutela esanez, beti ere modu onean. Dagoeneko bi disko zituztela komentatu ziguten eta 95etik zebiltzala talde bezala. Nine Inch Nails bezalako taldeen antzeko musika egiten omen dute", diosku Larratxe Strangeloveek. Erromako tadeaz gain, Espainian eta Hego Amerikan ere izen bereko hainbat banda zeudela ohartu ziren. Gauzak horrela, joan zen urtean Gure Irratia, Zure Rokanrrola bilduman parte hartzeko aukera suertatu zitzaien. Bandaren izena aldatzeko momentua zen. Egoera hartan eta beraiekin batera talde esanguratsuen izenak egongo zirela ikusita eman zen taldearen deitura aldaketa: "Sexty Sexers izena aspaldiko kontua da, taldeari Ameba izena jarri eta gutxira Ruta 66 aldizkaria irakurtzen ari nintzela bururatu zitzaidan. Eta gainera gitarra joleari lehenago otu ez izana pena zela komentatu nion. Sexty Sexers hitzak taldearen izaera zein den oso ongi transmititzen duela uste dut. Kartel, aldizkari edota egunkari batean irakurtzean, gaizki idatzia badago ere, berehala rock&roll banda bat etortzen zaizu burura. Horrez gain, idatzirik nola gelditzen den izugarri gustatzen zait".