Argia astekaria webgunearen hasiera

Alemania. Futbolak etekin erraldoiak dakartza. Bere inguruan sortzen duen komertzial munduak denak harrapatuak gauzka. Alemania osoa dago salgaiz inguratuta. Denda txikiek soilik bi mila milioi euroko gain-sarrerak ikuskatzen dituzte mundialaren bueltan. FIFAk berak mila eta bostehun milioiko fakturazioa du helburu mundialaren logotipodun artikuluen salmentaren bidez. Eta hauetan salduena baloia dugu Teamgeist markakoa hain zuzen, bakoitzak ehun eta hamar euro egiten duena. Emakumea ere ez da libratzen, "gau beroentzat" izendatu duten barne-jantziak sortu baitizkiete bereziki. Gobernuak hogeita hamar milioi euro destinatu ditu kultur programaziorako. Eta beste hogei milioi "Alemania: ideien erresuma" izeneko marketin kanpainarako. «Inoiz ez da izan kultura oraingo honetan bezain garrantzitsua", Otto Schilly ministro alemaniarraren hitzak dira. Orain artean, intelektualek ezkutuan zeramaten beren futbol zaletasuna. Egun, idazle eta artistek orokorrean, futbolaren eragin sozialari buruzko debateetan parte hartzen dute publikoki, eta beren ordezkariak lanean jarriak dituzte hedabide azkarrenetan bikain ordainduak egoteko aukeren bila. Industriaren parte izatera heldu dira. Lekutan geratu zaigu "Herriaren opioa" hura, kirola maite genuenon makila hura.