Diskoak
Chico Boom: «Gaur egungo talde oso gutxi dira guretzat erreferentzia»
|
2047. alea
2006-07-02 |
0
0
Zer eman eta zer kendu zizun hainbeste urtetan kide izan zinen Señor No taldeak?
Jarraitzeko bide bat eman zidan. Abentura asko, esperientzia handia eta bizipenakà Gauza on eta txar ugari. Eta zinegile karrera zapuztu zidan.
Gustura zaude orain arte lortutakoarekin?
Oso gustura. Zerbait desberdina egiten nabil, nahiz eta korapilatsuagoa izan. Nire kide berriak oso ondo egokitu dira eta badakite aurrera egiten. Oso ongi moldatzen gara elkarrekin.
Zure aurreko lana biziagoa eta zuzenagoa zen. Oraingoa, berriz, gitarra indartsuekin eta garage doinuekin hasten da, baina jarraian pop-rockean eta giro psikodelikoan barneratzen da.
Aurretik kaleratu nuen singlean izebergaren muturra besterik ez genuen erakutsi. Chico Boomek mota askotako eraginak ditu eta horiei zukua ateratzen saiatuko gara.
Azken lan honen kantuek iraganera eramaten naute ezinbestean.
Iraganak zeresan handia du guk egiten dugun musikan. Gaur egungo talde oso gutxi dira guretzat erreferentzia. Ona da antzekotasunak talde askorekin izatea. Hala, gure eraginak ez dira hain argi ikusten, rock musikaren baitan ezkutatzen dira-eta.
Chico Boom jaio zenean esan zenuen Imanolen proiektua baino haratago, proiektuak talde izaera hartzea nahi zenuela.
Bai, grabatzen hasi ginenean oraindik taldea definitu gabe zegoen. Erlojuaren kontra lasterka ibili gara etxeko lanak egin eta norbera taldean kokatzeko, baina bide onean gabiltza.
Hitzak oso intimistak dira eta pesimismoa eta desengainua erakusten dute.
Hala da. Bizitza zangotrabez beteta dago eta horrek frustrazioa eragiten du. Hori arintzeko aproposa da horretaz hitz egitea.
Zer gertatzen da denborarekin, esku artetik alde egiten digula?
Denbora oso gauza berezia da. Badirudi gero eta azkarrago doala. Nire kasuan denborak estutu egiten nau eta ez dit aurrera egiten uzten. Hortik dator EParen izenburua.
* * * * * * * * * * *
Squeezing the time
Chico Boom
gp records
Iraupena: 25,03 12,50 euro
Rockaren baitan dotoretasunaren bila
Chico Boom Señor Non ibilitako Imanolen ezizena da. Espainiako Estatuko rock and roll taldeen artean ikuskizun basatienetakoa ematen duen talde beteranotik jauzi egin ostean, bestelako ibilbidea hasi zuen. Birth single bizi-bizia kaleratu zuen, baina nabari zen iraganeko amorrua alboratuta, dotoretasunaren bila jotzen zuela. Hala egiaztatu du zazpi kantuz osatutako lan berri honetan. Garagetik gitarra zorrotzetako kantuetara salto egin eta The Soundtrack Of Our Lives-en pareko giro psikodelikoetan murgiltzeko gai da, iraganeko rockaren iturburu guztietatik edanez. Horretarako, alboan Surfin Kaoseko Koldo, soinua zizelkatzen ezinbesteko Alvaro organo jotzailea eta bateria jotzaileen artean maisu Andoni Señor No ohia dauzka. A! Eta Imanolek ingelesez abesteko daukan estiloak ere zur eta lur utzi nau.
Iruzkina idatzi
