Munduan zehar ezaguna da Errioxa ardoa. Di-Da komunikazio arloko adituek osatutako taldeak plazaratutako Ardobidez. Arabako Errioxa. Rioja alavesan, ordea, kokagune horretan egiten den ardoaren berri ematen da, gertutik ezagutu eta barrutik dastatzeko aukera izan dezagun Mikel Garaizabal enologo-somelierraren eskutik. Euskaraz eta gaztelaniaz argitaratutako liburuaren lehen atalean, Arabako Errioxa oinez, bizikletaz edo kotxez ezagutzeko txangoak agertzen dira. Bigarrenean, enologiaren oinarriak, upategietara inguratzeko tentazioa duenak emango dizkioten azalpenak ondo uler ditzan. Eta hirugarrenean, Arabako Errioxan dauden upategien zerrenda dator. Gainera, liburuarekin batera haietara zuzen joateko mapa ere eskaintzen dute.

Lurraren barne funtzionamendu orokorra ulerrarazteko asmotan sortutako liburua da Arturo Apraiz Atutxa geologo zornotzarrak Udako Euskal Unibertsitatearen eskutik plazaratu duen Plaka-tektonika: Lurraren funtzionamendua ulertzeko teoria. EHUko Geodinamika saileko irakasleak Lurraren mekanismoa ulertzeko beharrezkoak diren tresnak eta datuak azaltzen ditu, jarraian plaka-tektoniken teoriaren bilakaera historikoa garatzeko. Bizi garen planeta honetan gertatzen ari diren lurrikarak eta sumendiak non sortzen diren eta sortzeko dauden arrazoiak adierazten ditu gero, eta horren ondoren gaur egun plaken arteko mugetan gertatzen ari diren prozesu geologiko nagusiak (rift-eremuak, kolisioak...).

1924an Alemaniako Bambergen sortu zen Karlheinz Deschner-ek idatzitako El credo falsificado edonorentzat izan daiteke interesgarri, baina bereziki erlijio katolikoko egia eta dogmei buruzko sinesmena duenarentzat. Behinik behin Teologian, Filosofian eta Historian lizentziatua den gizonak lan horretan zalantzan jartzen dituen gaiak kristau horrek beti uste izan duenarekin alderatzeko besterik ez bada ere. Kristo benetan existitu zen ala ez sinesteko dauden arrazoietatik hasiz, haren izenean gureganaino helarazi dituzten irakaspenak egiazkoak ote diren edota era interesatuan transmitituak izan diren aztertzen du Mikel Arizaletak itzulitako Karlheinz Deschner-en El credo falsificadok. Egile berarena da ere hamabi liburuki dituen Historia criminal del cristianismo izenburuko bilduma.

Euskal Herriko karmeldarrek plazaratzen duten aldizkariaren azkeneko zenbakian Benedikto XVI.ak apezpikuei, apaizei eta diakonoei sagaraturiko gizon-emakumeei eta fededun laiko guztiei kristau maitasunaz bere garaian zuzendu zien Deus caritas est gutun-entziklikaren itzulpena apailatu du Luis Baraiazarrek. Aita Santu horren aurreneko entziklika zen, eta bertan esaten zituen gauzen artean honakoa zetorren: «Maitatu lagun hurkoa zeure burua bezala». (19,18; ik. Mk 12, 29-31). Eta, lehenen maite izan gaituena Jainkoa izan denez gero (ik. 1 Jn 4, 10), orain maitasuna ez da «agindua» soilik, maitasun-dohainari emandako erantzuna baizik. (...). Jainkoaren izena, batzuetan, mendekuarekin edota are gehiago gorrotatzeko eta indarkeria erabiltzeko eginbeharrarekin lotzen den munduan, hau gaurkotasun handiko mezua da eta esanahi oso zehatza duena».

Donostia Kulturak plazaratzen duen Nosferatu zinema aldizkariak Joaquín Jordá (1937) zinemagile katalanari eskaini dio azkeneko alea. Bartzelonako Eskolako ideologo nagusi aspaldi bilakatu zen gizon honek, zinema lantzeaz gain -dokumentalak, fikziozko filmak eta telesailak gutxienez-, antzerkia, telebista, literatura eta itzulpengintza ere landu ditu. Joaquín Jordák, hala ere, ez dio arreta berezirik jartzen filmatzen dituen irudien edertasunari; garrantzia irudi horien edukiari eta haien gainean egiten duen narrazioari ematen diolako. Gizarte eztabaidan parte hartu nahi duen zinemagintza da berea, eta gauzak nola esaten diren baino gehiago zer esaten duen axola dio.

Jose A. Lopetegik sortu eta marraztutako komikia da Pirata, mutiko bihurri baten eta haren ingurukoen eguneroko bizitza agertzen duena. Amarekin bakarrik bizi da Pirata, gurasoak bananduta dituelako, baina noizean behin aitarekin ere egoten da, jakina. Eta hain zuzen ere bere gurasoen bakardadea «konpontzen» ahaleginduko da mutikoa komikiaren bigarren liburu honetan. Ez zaio guztiz ondo aterako kontua, baina, tira! Bestelakoan, eskolan zigortua eta bere lagun mordoaren adiskide eta etsai izaten jarraituko du Piratak.