Maialen Lujanbio
Doinua: Anderea gorarik edo Ezkotariarena.
I
Buzo urdinak
klase-arteko langaren
azpian, nola
jauntxoen eskulan garen.
Kate-laneko
lau mila-pasa langaben
begi galdua
izan liteke Landaben.
II
Buzo laranjei
zerutik behera jaramon
begi urdin bik:
"Move fucking terrorist, come on!"
Ilargi etzana
nola zut ta galant dagon,
eguzki puskak
belauniko Guantanamon.
III
Kamuflajeko
buzodun General gore:
dunetan hondar
ta lore artean lore.
Zorua bete
duzu bortxa ta dolore...
... kamaleoia
bere lurraren kolore.
IV
Buzo marradun,
lehen "noiz arte?", gaur noizkoak...
Chaplinen preso
filmeetatik herdoiz joak.
Ajatu ziren
marra horizontal ohizkoak,
ta bertikalak
ez izan algodoizkoak...
V
Legeen garçon,
zigor truk ditu biziak
buzo beltz bat den
toga baten gutiziak.
Entzutegian,
nahiz ez bistan guztiz biak,
begi batetik
ikusten du Justiziak.
VI
Buzo zuri bat
josi dizute larruan,
esku ta hanka
ehun ebillen amarruan.
"Eskizofrenia
bipolarra, bat graduan",
metastasi bat:
mundua buru barruan.
Lege Oharra
RSS sindikazioa