Alberto Ladron Arana: «Suspensezko thriller bat da. Ezustekoak eta zirrara ditu ezaugarri»
Pilar Iparragirre
Nolakoa da Arotzaren eskuak?
Suspensezko thriller bat da. Ezustekoak eta zirrara dira nobelaren ezaugarri nagusiak. Anek ikertzen duen misterioak bere erroak iraganean dituen arren, ez nuke nobela historikotzat sailkatuko, argumentua gaur egun gertatzen baita.
II. Mundu Gerrak beti du nolabaiteko lekua zure idazlanetan. Zergatik?
Oso une historiko interesgarria deritzot, eta nire ustez halako garai nahasi batean istorioa girotzeak aberastu egiten du argumentua, eta erakargarriago egin. Hala ere, Xake Mate edo Eguzki Beltzaren sekretua ez bezala, Arotzaren eskuak gaur egunean dago giroturik eta II. Mundu Gerra iraganeko erreferentzia moduan besterik ez da agertzen.
Nola osatu duzu zure azken lan hau?
Dokumentatzeko erruz erabili dut Internet: bai pertsonaiek erabiltzen dituzten armak, autoak, tresna elektronikoak eta abar deskribatzeko, bai nobelan agertzen diren tokiak aukeratzeko. Adibidez, Frantziako Metz hiriko turismo bulegoak informazioa bidali zidan hiriari eta bertako posta bulegoari buruz, eta Maginot Lerroa ikertzen duen erakunde batek aholku oso baliagarriak eman zizkidan. Gainerakoan, historia liburuak eta elkarrizketa zuzenak erabili ditut (sendagile eta abokatuekin, adibidez) nobelari sinesgarritasuna emateko.
Nobelako protagonista emakumezkoa da.
Alde batetik istorioak hala eskatzen zidan, eta bestetik, orain arteko nire protagonista guztiak gizonezkoak izan dira, eta aldatu nahi nuen. Erronka berri bati aurre egin nahi nion.
Erantzunak
Erantzunik ez dago.
Izartxoaz (*) markaturiko datuak derrigorrez bete beharrekoak dira.
Lege Oharra
RSS sindikazioa