Argia astekaria webgunearen hasiera

ESI European Software Institute hitz ingelesen laburdura da eta Zamudion du egoitza. Pyme (Enpresa Txiki eta Ertainak) teknologikoentzat «munduko kalitate markarik» onentzat jotzen da. Euskal zentro teknologiko honek enpresa eta segurtasun kudeaketarako, eta software eta sistemen garapen prozesuentzat egiten du lan. Amerikako Estatu Batuetan bulego berria ireki du duela urtebete munduko software merkatu handienari ekiteko helburuarekin. Geroari begira zentro honen lan helburuetako bat da ESInet merkataritza sarearen eta ESIcenters nazioarteko software bikaintasunaren zentroen multzoa sendotzea. Iaz Zamudioko zentroak IT Mark plazaratu zuen. IT Mark ziurtagiriak TICen sektorean produkzio eta sistemen mantenurako lan egiten duten Pymesen prozesuetan kalitatea eta heldutasuna egiaztatzen du. CTIC Fundazioarekin hitzarmen bat sinatu zuen. 66 langile eta 10 bekadun ditu eta 2004an 46 proiektu gauzatu eta bere salmentak 6,8 milioi eurotara iritsi ziren.

Lasarte-Oriako Udaleko euskara teknikari Iñaki Arrutik gipuzkoaeuskara.net web gunean eman du datu horren berri, baita saiatu ere euskaraz hain gutxik egitearen arrazoiak azaltzen. %4 hori %8ra igo daiteke portzentaia euskara dakitenak kontuan hartuta ateratzen bada. Guztira 343.796 aitorpen egin dira eta 13.964 euskaraz. Arrutik aipatzen du, nabardurak nabardura, Gipuzkoako Foru Aldundiak aitorpena euskaraz egiteko aukera guztiak ematen dituela.
Arrutik «hizkuntza-hautua» kontzeptua hizkuntza komunitate txikien etorkizunerako klabetzat jo du. Kasu honetan, aukera berbera izatea gaztelaniaz eta euskaraz. Gizakia ohitura beti-berdineko animalia izaki, hizkuntza komunitate gutxituko gizakiak ohitura aldatzeko gaitasuna landu beharko omen du.

1998ko banaketan irrati lizentziarik gabe geratu zen Iruñeko Euskalerria Irratia eta orain ere beste hainbeste gertatu zaio. Banaketa hura bertan behera uzteko agindu zuten epaileek eta prozesua errepikatzeko. Hala egin dute eta berriz ere lizentziarik gabe utzi du Nafarroako Gobernuak Iruñeko irratia. Euskalerria Irratiak maiatzaren 27rako egin du deialdia, lizentzia banaketa bidegabea berriz ere kalean salatzeko.

Maiatzaren 27an amaituko dute kanpaina. Martxoan hasi ziren 16 eragile eskolak euskalduntzearen aldeko kanpainarekin. Eragileek balorazio baikorra egin dute eta maiatzaren 27an, manifestazioaz gain (Donostian izango da), hilabete hauetan jaso duten atxikimendu (sinadura) kopuruaren berri emango dute.

Konpromiso horixe eskatu die Kontseiluak herritarrei: sakelako, etxeko, zein lantokiko telefonoa euskaraz erabiltzea. Erantzungailua euskaraz jartzea, sakelakotik mezuak euskaraz bidaltzea, sakelako hizkuntzatzat euskara ezartzea, operadoreei euskaraz hitz egiteko eskatzea... Horietako ekintza batzuk norbanakoaren esku daude, baina Kontseiluak berak frogatu ahal izan duen moduan, telefoniaren munduak ez dio tarte handirik egin euskarari.