Argia astekaria webgunearen hasiera

Ximun Haran (Arrangoitze, 1928). Pilotari ohia. Farmazialaria lanbidez. «Entzuna nuen farmazialari izanik, sosa egin zenezakeela, lanik egin gabe. Eta nihaur ez naiz farmaziara sarri joana». Pilotari ari zen 50eko hamarkadan Zuberoako kantak magnetofoian bildu zituenean Barkoxen, Santa Grazin eta bestetan. Berdin egin zuen Senperen eta Amotzen, eta Bermeon, Azkoitian, Bilbon... Kulturak politikara eraman zuen. Enbata sortu zuen 1962 aldera. «Itsasuko ageria»ren bultzatzaileetakoa izan zen. 80ko hamarkadaren hasieran PNBn lan egin zuen. Ipar Buru Batzarreko kide izan zen hamar bat urtez, dimisioa eman zuen arte. Erretreta harturik Ager aldizkariaren kudeatzaile da bizitokitik. Garai baten lekuko eta eragile handi da Ximun Haran.