Garaiak bizi omen ditugu. Hori diote behintzat han eta hemen. Iratzargailu irratiduna dugunetik, horrekin esnatzen gara, horrek gaitu laguntzen komoneko lehen jardunean. Gutxienez bi parte behar dira edozein auzitan, eta nago oraingo honetan bakarra dugula zerbait adosteko prest lanean dabilena. Ez dirudi estatuen aldetik hobekuntzarik dagoenik. Azken atxiloketek ez dute behintzat esperantzarik ekartzen, Guardia Zibiletako kuartelilloetako tratuak beti bezalakoak baitira, torturapean oinarrituak. Ibon Meñikak salatu du torturatu egin dutela eta nik behintzat ez dut dudarik egiten. Eta edozein adoste aitzinean parte bat soilik gertatzen baldin bada onuraduna, malo, bestea kaltetua irten denaren seinalea baita. Ez dirudi hori metodorik egokiena bizi dugun egoera liskartsua baretzeko. Beti izango da norbait Barañainen eta Getxon erasotzeko, kontuan hartuta bestela ere, berez, prozesu honek aski etsai badituela indar kontserbadoreen artean. Ez ninduke harrituko eraso hauek armadun profesionalek eginak direla jakiteak, lehen ere plater horietarik ederki hornituta baitago herri hau, horien sukaldeek ez baitute beste menu klaserik ezagutzen. Sanzek eta, ez dute zalantzarik. ETA dugu arduradun. Memori urria dute, Madrilek salatzen ditu martxoaren hamaikako batean.