Pedro Martinez de Eulate Lizarrakoa eta Juan Martinez de Irujo Iberokoa, nafarrak biak. Biak bizi dira giro erdaldunean, familia erdaldunak dituzte eta eskolan gaztelaniaz ikasi dute. Biak daramatzate hiru urte Iruñeko AEKren Iruñazar euskaltegian euskara ikasten. Hirugarren urratsean ari dira eta oraindik hedabideekin euskaraz aritzen ausartzen ez direla esan zioten Berriari joan den astean, igandeko pilota finalaren aitzakian egindako erreportajean. Gaur txapela, bihar EGA jartzen duen pankarta ez zuen ikusi telebistaz hau idazten ari denak, baina euskaltegiko ikaskideek askotan eramaten dute pankarta hori bi pilotarien partidetara. Igandean, txapela irabazi zuen Irujo-Eulate bikoteak eta mikrofonoa segituan gerturatu zien Koldo Aldalur EITBko kazetariak. Irujori gaztelaniaz egin zion elkarrizketa eta bukaeran galdetu ea noizko euskaraz; «datorren astean» erantzun zion Iberokoak, ez dakigu txantxetan ala serio. Eulateren txandan bestela izan zen, euskaraz aritu zen. Ez dakigu EGA gaindituko duten inoiz, baina Eulatek ez du pauso makala eman, Fernando Goñik duela ez hainbeste egin zuen bezala.