Argia astekaria webgunearen hasiera

Inoiz ez didate eskatu zer den garrantzitsua eta zer ezinbestekoa bereiztea. Nik ere inoiz ez diot inori ariketa hori egin dezan eskatu. Nolanahi ere, azkenaldian galtzen ditugun gauzei buruz idazteko gogoa daukat, eta ez hainbeste eskuragarri eduki ditzakedanei buruz. Eta iruditzen zait galtzen ditugun gauzak garrantzitsuak izan daitezkeela, baina inoiz ere ez ezinbestekoak.
Galtzearen artea ez dela zaila ikasten idatzi zuen Elisabeth Bishop-ek, badirela galdu nahian diruditen gauzak, eta honek ez dakarrela hondamendirik, kontua dela gero eta gehiago eta azkarrago galtzea. "Zu zeu galtzean ere -keinu burlatia, hainbeste maite dudana-/ez nuen gezurrik esan behar izan./Bistan da: galtzearen artea ez da zaila ikasten/nahiz eta horrek (esazu!) hondamendiaren itxura izan".
Bishopek jaio eta berehala galdu zuen aita, eta ama ere gaztetan galdu zuen. Bere bizitza bidaiatzen pasatu zuen alde batetik bestera. Brasilen barrena bidaiatzen, esate baterako, urte askotan ibili zen. Bertan idatzi zuen Artea poema, galtzearen arteari buruzkoa. Gehien maite zuen herrialdean idatzi zituen gauzarik ederrenak.