Gipuzkoako Foru Aldundiko Euskararen Normalkuntzako Zuzendaritzak 2006ko diru-laguntzetan, iazkoarekin alderatuta, %10,8ko igoera egin du. Igoera horrek hiru sailetan eragingo du: aldizkarietan, euskal kantagintzan eta alor sozio-ekonomikoan. Diru-laguntza kopuru handiena jasoko duten atalak dira honakoak: aldizkariak (814.520 euro), informazio teknologiak (481.100), euskararen erabilera soziala normalizatzeko udal planak (325.000) eta euskara sustatzeko proiektu eta jarduerak (285.000).

Miguel Sanzek irrati lizentziak berriz

Euskalerria irratiak epaileengana jo du Gobernuari gehienez ere bi hilabeteko epea eman diezaioten irrati lizentzien banaketa egiteko. Nafarroako Gobernuko presidente Miguel Sanzek ez du presarik, ordea. EAk eskatuta parlamentuan hitz egin du Sanzek eta esan du epaileen sententzia Gobernuak beteko duela, eta orain arte bete ez badu ez dela izan borondate faltagatik, hainbat arazo izan duelako baizik. Mahaia biltzera deitu du, baina mahaia osatzeko bilera noiz izango den ez du zehaztu.

Otsailean, Bilboko Alde Zaharrean, ertzainei euskaraz egiteko eskatu zien herritarra atxilotu zuten. Albisteak izan du oihartzunik sarean. Tiraka izeneko blogean, euskararekiko kezka izan eta Eusko Jaurlaritzan lan egiten duen hainbatek parte hartzen du. Ertzain batek Ertzaintzak euskararekiko duen jarreraz idatzi duen bati erantzun berri dio. Hona pasarte batzuk: «Zoritxarrez, euskal gizarte mediatiko politiko honek eltzekada ugari, eta ez beti gozoak, prestatzen dizkigu. Eltzekada ugarienak uniformatzaileak dira (...). Ez gaitzazue uniformatu zuek ere, nahiz eta uniforme bera jantzi Ertzain guztiok (...). Gutxik dute ahalmena, eta nahia, euskaraz jarduteko beraien herritarren aurrean, hauek hala eskatuz gero. (...) Baina, zer gertatzen da Ertzaintzan lan egiten dugunok ezin dugunean euskaraz lan egin? Non dago euskal zale jendea? Oholtza zaleak, non zaudete? Etengabea da Euskararen Legearen urraketa Ertzaintzan, benetan. (...) Egoera hau salatuz barne idatzi bat egin dugu Ertzain talde batek. (...) Ez ahaztu gutaz, guk ere euskaraz hartu nahi baitugu arnasa!». Ertzainaren testu osoa daukazue http://tiraka.blogspot.com-en.