Argia astekaria webgunearen hasiera

Itoizko urtegia eta Plan Hidrologiko Nazionalaren obrak gezurren gainean egiten ari dira, gezur ekonomiko eta desarrollistan oinarrituta. Politikarien trapitxeoa edota xehekako salerosketa handiak daude atzean. Ebro ibaiaren arroko laborari gehienak adin handikoak dira. Ubidea datorrela-eta, ubidearen lotura eta beren lurrak ordaindu -dirutza- beharko dituzte berriz ere. Hauen seme-alabek bizitza osorako hipotekatu beharko dute, sistemak hautatutako uzta landu beharko dute, beren laborea murriztua eta ureztatua izango da, beste lurralde batzuetako laborantza ordezkatzera behartuak. Murtziakoa kasu. Hango lurrak arrunt lehorreraziak daude engoitik. Negutegiko baratzeek -berotegiek- Erriberako lurrak estaliko dituzte aurki, horrek inmigrazioaren ustiaketa dakar. Laborariak ez du deus balio, hektarea kopuruak baizik, tamalez, dituen hektareen arabera balio du laborariak. Uraren lotura hartzen ez duenak -txikia delako- ezin du lehiatu, eta hor dago terratenientea bere lurra erosteko. Hau da, laborariak politika desarrollistari segitu ezinean, lurra laborantzako enpresa handien aldeko politika sustatzen dutenen esku geratuko da.