Argia astekaria webgunearen hasiera

Vulpes taldeak diskoa plazaratu du, taldea desegin zenetik 22 urtera: Me gusta ser (Oihuka). Zalaparta dezente sortu zuen neska taldeak bi single soilik zituen argitaratuta orain artean. Taldekideek orain urte batzuk hildako Lupe bateria jotzailea omendu nahi izan dute.

Itxaro Bordak, Koldo Izagirrek, Karmele Jaiok eta beste hamabost idazlek kartzelan dauden euskal presoei zuzendutako gutunak bildu ditu Txalaparta argitaletxeak Adiskide maitea liburuan. Gutun intimoak, fikziozkoak nahiz gogoetak papereratu dituzte idazleok.

Prudencio Irazabal artista arabarrak azken boladan egindako lanak bildu dituzte Gasteizko Artium museoan dagoen Highlights erakusketan. Urtarrilaren 15a bitartean ikus daitezke argia elementu nagusi duten margolanak.

Itxaso Díazek Tr3inta dokumentala errodatu du, Bilboko kultur sorkuntza aniztasuna islatze aldera. Hogeita hamar urteren bueltan dauden hogeita hamar artistari (Saioa Olmo artista, Ion Fiz moda diseinatzailea, MEM jaialdia, Las Fellini...) eginiko bi minutuko elkarrizketak ageri dira dokumentalean.

Joxe Mari Carrerek hitzok izkiriatu zituen Hikan: «Premiazko antzerkia egiten dugu Euskal Herrian. (...) Inoiz baino antzoki publiko gehiago dago. Inoiz baino azpiegitura publiko gehiago. Horietara heltzeko garaian ordea, trabak askotan gaindiezinak dira. Antzerki talde edo konpainia batek, antzezlan bat sortzearen zurrunbiloan sartuz gero, berak eta berak bakarrik egin beharko du apustua, askotan itsua, izan ere ez baitu jakingo hartutako lan hori ustezko publikoarengana eramateko aukerarik emango ote dioten».

Beatriz-D margolariak Garari esanak: «Nik ez dut inoiz izenik jartzen (koadroetan). Izen bat jartzen badut, itxiera bat da, izena jartzen badut irakurketa ardatza emango dut automatikoki eta automatikoki ikusiko duzue nik ezarri dudana eta niretzat margolana zuek zarete (ikusleak), zuek ikusten duzuena, nire ustez, hori da interesgarria».

Joseba Zulaikak adierazpenok egin zizkion Diario de Noticias de Alavari: «Gu gara euskal kulturaren ingelesezko atea, mundu globalera zabaldu ahal izateko euskal kulturari itzulpena egiten diogu guk (...) Gure merkatua Estatu Batuetan dago gehienbat. Baina Euskal Herriko Unibertsitatean ingelesa sartzen den neurrian gure liburuak aitzindariak izan daitezkeela uste dut».