Argia astekaria webgunearen hasiera

Tecnalia euskal korporazio teknologiko bat da, egoitza soziala Bizkaiko Teknologia Parkean du eta Derion kokatuta dago. Azken urteotan sortua da, eta berrikuntza teknologia erabiliz eta sustatuz inguru ekonomikoa eta soziala garatzen laguntzea du xede, horretarako ikerkuntza garatuz eta zabalduz. Tecnaliak aliantza estrategikoa gauzatu du zentro atxiki gisa, Azti, European Software Institute (ESI), Inasmet, Labein, Robotiker eta Neiker zentroen artean. Aliantza horri esker, Tecnalia korporazioak 1.000 profesional arras kualifikatutik gora dauzka. Tecnaliak, bestalde, jarrera proaktiboa dauka, bere erlazio-sarea kide korporatibo berriak gehituz eta aliantzak ezarriz konfiguratzeko. Tecnalia fundazioa enpresen bazkide estrategikoa izaten saiatzen da, berrikuntza teknologikoaren arloan: aterabide berritzaileak ematen dizkie, eskaintza integral eta sektorializatu baten bitartez, eta lidergoan aurrera egiten ahalegintzen da teknologian etengabeko espezializazioa markatuz. Tecnaliak 1.145 langile baino gehiago dauzka plantillan, horietatik 100 baino gehiago formazio teknologikoan, 125 enpresa eta entitate zentroetako aginte-organoetan, 24 egoitza (120.000 metro koadro), 3.500 enpresa bezerotik gora urteko eta 75,55 milioi euroko fakturazioa.

Correo taldeak 1999ko azaroaren 27an argitaratu zuen Zabalik asteburukariaren lehenengo zenbakia. Nerea Azurmendi zuzendari zela, euskara hutsezko egunkari formatuko astekaria jarri zuten abian. Batik bat asteburura begira sortutako aldizkaria zen. Aurtengo urtarrilaren 20an eraberrituta kaleratu zuten Zabalik. Formatu txikiagokoa egin zuten, orrialde gehiagorekin eta ostiralean beharrean, ostegunetan jarri zuten saltzeko. Edukiak ere aldatu zituzten. El Diario Vasco edo El Correorekin batera erosiz gero 0,35 zentimotan saldu dute.

Sortzen-Ikasbatuazek azaldu duen arabera, Euskal Herriko Ikasleen Gurasoen Elkarteak eratze aktan jasotakoarekin ados ziren eta "elkargune berri horretan parte hartzeko beharra sortu zion". Paperekoa ez omen da errealitatean bete, ordea. Besteren artean aipatu ditu puntu hauek: erabakiak adostasunez ez hartzea, EAEn D ereduaren aldeko apustu garbirik ez egitea, Euskal Curriculumaren egitasmoan ez parte hartzea, hezkuntza eragileekin elkarlanean ez aritzea eta elkartearen izena begirunerik gabe erabiltzea. EHIGEk erantzun duenez, Sortzen-Ikasbatuaz, erakunde moduan, ez da inoiz EHIGEko partaide izan, eta Sortzen Gurasoak eta Ikasgela izan dira orain arte, Euskal Herriko Guraso Elkartean parte hartzen zutenak.

Rosa Miren Pagola eta Patxi Salaberri ziren hautagaiak Patxi Ondarraren ordez, euskaltzain oso kargua hartzeko. Euskaltzaindiak Patxi Salaberri nafarra aukeratu du gehiengo osoz. Salaberri Uxuekoa da eta Nafarroako Unibertsitate Publikoko irakaslea da 1986az geroztik. Filologia eta Hizkuntzaren Didaktikaren Departamenduko zuzendaria da.

Nafarroako Gobernuak hedabideen alorrean euskara sustatzeko ematen dituen diru laguntzarik gabe geratu da aurten ere Euskalerria Irratia. Iaz ere gauza bera gertatu zitzaion. Ez du diru laguntzarik jaso emititzeko lizentziarik ez duelako. Euskalerria Irratiko zuzendari Mikel Bujandak dioenez, "ukatzen digutena eskatzen digute". Lizentzia lortzeko azken aukera duela zazpi urte izan zuten eta orduan, ez zioten eman Euskalerria Irratiari. Irratiak epaitegietara jo zuen epaiarekin ados ez zirelako eta oraindik epaiaren zain daude.

LAB eta ELAren arteko harremanak nola dauden galdetu dio Berriako kazetariak LABeko idazkariorde Ainhoa Etxaideri: "Une honetan, zoritxarrez, langileek ikusten duten bezala. Gauza asko elkarrekin egin ditzaketen bi sindikatu daude; aldarrikapen ia bertsuak ditugu eta helburuak ere oso antzekoak dira, baina ez dago adostasunik helburu horietara iristeko moduari buruz. Elkarrekin egin ditzakegun borrokak batera egitea indar metaketaren bidean eraginkorrak izateko modu hoberena da. Baina lan bateratu hori egiteko ez dago adostasunik eta, gainera, adostasun horiek bilatzeko baldintzak ere ez dira hoberenak".

PSE-EEko diputatu den Eduardo Madinak baikortasunez ikusten du akordio politiko orokorra. El Paiseko kazetariak Zapaterok ordain dezakeen prezio politikoaz galdegiten dio: "ETA ez da eragile politikoa, erakunde terrorista da . Beste kontua da alderdi politiko guztiek adostuko duten akordio politikoa, hori ona izango da eta ez diot inolako beldurrik. Akordio hori gero kontsulta bidez berretsiko du euskal gizarteak".