Urte hasieran Madrilgo Kongresuak di-da batean atzera bota zuenetik, Ibarretxe Plana alboratua geratu da plano mediatikoan. Eusko Legebiltzarrerako hauteskundeak etorri ziren gero eta apurka balizko bake prozesu batek hartu du protagonismoa euskal politikan. Sortutako hiruki ospetsuaren erpinetako bik, PSE-EEk eta Batasunak, alboratutzat jo dute. Ibarretxe lehendakariak, aldiz, planak berriz gaurkotasuna hartuko duela iragarri izan du. Eusko Jaurlaritzako sailburu eta EAko buruzagi Joseba Azkarragak iragarri berri du elkarrizketa batean Ibarretxe Planak berriz hartuko duela indarra legealdi honen azken bi urteetan; bakea eta normalizazio politikoa lehenesteko, legealdi hasieran alboratzea erabaki zela, baina prozesu hori bideratu ondoren berriz eztabaidatu beharko dela plana.