Argia astekaria webgunearen hasiera

Ibon Sarasolak Alberdania argitaletxearekin eta BBVA fundazioaren laguntzarekin Zehazki Hiztegia argitaratu du. Gaztelania-euskara formatua dauka eta 100.000tik gora sarrera. Hiztegi hori egiteko Sarasolak oso kontuan hartu du bere gidaritzapean argitaratu berri den Orotariko Euskal Hiztegia.

Abenduaren 15ean Kafe Antzokiaren 10. urteurrena ospatzeko jaia egingo dute. Abenduaren 15a baino lehen eta ondoren ere, urte osoan bezala, baina urteurrena gogoan, ekitaldi mordoa antolatu dute Kafe Antzokian. Antzerkia, kantua, dantza eta bertsoak izango dira besteren artean. Egitarau osoa aurkituko duzu www.kafeantzokia.com-en.

Manu Robles-Arangiz Institutuak Euskalgintza sindikalgintzan txertatu (II) liburua argitaratu du. Lan mundua eta Euskal Herriko kulturgintzan diharduen jendea hurbiltzeko asmoz 2004an hitzaldi sorta antolatu zuen institutuak eta orain bigarren liburua argitaratu du. Koldo Izagirreren (Greenwichekoa ez da meridiano bakarra) eta Kike Amonarrizen (Lan munduak zabalduko al du euskararen etorkizunaren atea?) hitzaldiak daude liburuan eta Maialen Lujanbio eta Unai Iturriagak botatako bertsoak eta egindako solasaldia. Lehenengo liburuan Jon Sarasua, Martxelo Otamendi, Bernardo Atxaga eta Joan Mari Torrealdairen hitzaldiak jaso zituzten.

Lehenengo aldiz Zuzenbidearen Euskal Akademiak Aldizkaria izeneko agerkaria euskara hutsean argitaratu du. Urtean argitaratzen dituen lau aldizkaritatik bat euskara hutsean egitea da 2003. urtean euskal zuzenbidea ikertu eta zabaltzeko asmoz sortu zen akademiaren helburua. Sailaren zazpigarren zenbakiarekin lortu dute hori. Besteren artean, 7. zenbaki horretan idatzi dute F. Javier Arrieta, Alberto Atxabal, Andres Urrutia, Esther Urrutia, Santiago Larrazabal eta Jon-Mirena Landak.

Gamesa korporazio teknologikoa da, eta aeronautikaren eta berriztatzeko energien sektoreetan aritzen da diseinuan, fabrikazioan eta produktu nagusien, instalazioen eta zerbitzu aurreratuen hornikuntzan. Oraintsu, salgai jarri du aeronautikako dibisioa, berriztatzeko energien arloan zentratzeko. Lan-eremu horretan, jatorri berriztagarriko energia elektrikoa generatzea du jardun nagusi, eta parke eolikoen promozioan eta gestioan, promozionatzen dituen parkeen salmenta errekurrentean, aerosorgailuen diseinuan, fabrikazioan eta salmentan eta zerbitzu aurreratuen prestazioan oinarritzen du aktibitatea, bereziki. Gamesak Gasteizen dauzka egoitza soziala eta produkzioko zentro nagusia, eta 1976an hasi zen lanean. Orduan parke aeronautikoa zuen aktibo nagusia, eta arlo horretan kontratu handiak izan ditu munduko gainerako enpresekin. Gaur egun, ordea, makina eta instalazio eolikoen diseinura, fabrikaziora eta komertzializaziora bideratu du jarduna batik bat, eta, azken batean, produktu eolikoen gestio integralera. Gasteizko instalazioez gainera, beste hainbat ditu Espainian. 2004an, 7.221 laguneko plantillarekin eta bi dibisioak abian zituela, 1.745 milioi euro fakturatu zituen eta 221 milioi euroko irabazi garbia bereganatu zuen.