Argia astekaria webgunearen hasiera

Dassault Aviation, S.A. talde aeronautiko frantsesa da eta produkzioko instalazioetako bat Biarritzen (Lapurdi) dauka. 1936an sortua da eta Frantzian ez ezik, bost kontinenteetako 70etik gora herrialdetan ere badago, zeinetan milaka langile ari diren lanean. Talde aeronautiko frantsesak arlo zibilerako eta militarrerako egiten du lan, eta goi teknologiako konpainia industrialen sare bati ematen dio negozioa, hala Frantzian, nola Europan, Estatu Batuetan eta munduko beste herrialde batzuetan. Jarduera militarrean, gerrako hegazkinaren Europako kontsortzio baten buru da, Frantziarekin, Greziarekin, Italiarekin, Espainiarekin, Suediarekin eta Suitzarekin batera. Hain zuzen, iaz izenpetu zuen ardurako kontratu bat gerrako hegazkinari buruz, EADS multinazionalarekin. Biarritzeko instalazioetan, osagai aeronautikoak ekoizten ditu eta ekipamenduak errebisatzen, baina, horrez gainera, hegazkinen fuselajeen akoplamenduak eta haien osagai batzuen muntadurak ere egiten ditu. Lapurdin, mila lanpostu baino gehixeago dauzka. 2004. urtean, Dassault Aviation, S.A.k 3,3 milioi euro fakturatu zituen: %51 arlo zibilean eta %49 arlo militarrean. Irabazietan, 295 milioi inguruan ibili zen.

Orotariko Euskal Hiztegiak 16 liburuki ditu -lehenengoa 1987ko abenduan argitaratu zen-, 125.987 sarrera eta 14.028 orrialde. Koldo Mitxelenak Azkueren Diccionario Vasco-Español-Francés izan zuen abiapuntu eta Ibon Sarasolak Mitxelenaren lanari segida eman zion. Sarasolak argi adierazi duen moduan, hiztegia «obra deskriptiboa da; eta beraz, ez da arauemailea». Hiztegian garai, toki eta mota guztietako euskal hitz-ondarea biltzen da. Euskaltzainburuak, Andres Urrutiak, azaldu duenez, hurrengo urratsa hiztegia digitalizatu eta sarean jartzea izango da.

1981az geroztik, Espainiako Estatistikako Institutu Nazionalaren eta Eustat-en arteko hitzarmenari esker, EAEko errolda datuez gain, hainbat datu soziolinguistiko jaso da Araban, Bizkaian eta Gipuzkoan. Bost urtero izan ditugu euskararen ezagutzari, ama hizkuntzari eta etxeko hizkuntza erabilerari buruzko datuak. Badirudi ordea, INEk errolda ez duela bost urtez behin berrituko, baizik eta etengabe berritzeko sistema ezarriko duela. Horrela egiten bada EAEn datu soziolinguistikoak jaso gabe geratuko dira. Eustat-ek adierazi duenez, ezagutza eta ama hizkuntzari dagozkion datuak biltzeko modua egin dezake erakundeak berak, baina erabilerari buruzko datuak jaso gabe geratuko lirateke baliabide ezagatik.

Irratia abian jarri baino lehen bazkideen sostengua lortzeko kanpaina egin dute, baina ez dute beharrezko bazkide kopurua lortu. Hala ere, proiektua urtarrilean bertan abian jartzea erabaki du Azti-Begia elkarteak eta irratia martxan dagoen bitartean jarraituko dute bazkide berriak egiteko kanpainarekin. Irratiaren izena ere aurki ezagutaraziko dute.

Tinko euskara elkarteak lau film prestatu ditu Donostiako Warner aretoetan emateko: Mozart txakurra, (abenduak 4), Mixina (abenduak 18) eta Iratxoen erregea (urtarrilak 6). Ikasgela hegalaria filma azaroaren 20an hasi ziren eskaintzen. Ikusle kopuruaren arabera asteburu gehiagotan edo gutxiagotan eskainiko dituzte filmak.