Euskararen inguruko albiste laburrak
Hik Hasi aldizkaria berrituta
Irakaskuntza alorreko Hik Hasi aldizkariak azken zenbakia (101.a) itxuraldatuta argitaratu du. Hemendik aurrera koloretan izango da eta diseinu berriarekin. Orain arte argitaratu dituzten zenbaki guztiak sarean jarriko dituzte edonoren eskura.
Euskarazko prentsa idatziaren eskaera
2006ko Diru-laguntzetan milioi bat euro gehiago emateko eskatu diote segidako hedabideek Eusko Jaurlaritzako Kultura Sailari: ARGIA, Aizu!, Elhuyar, Berria, Gaztetxulo, Xirika, Galtzaundi, Nabarra, Bertsolari, Topagunea, Jakin eta Herriko (Herri Komunikabideak Kooperatibak). Hedabide hauen ustez, azken bost urteotan ez da gehitu euskarazko prentsarentzako diru-laguntza. Gainera, eskatu dute zenbatekoa lehen seihilekoan jakinarazteko eta ordaintzeko. Aurtengo diru-laguntzen kopurua oraindik ezezaguna da.
Euskal Herrian Euskarazen
hausnarketa eta etorkizuneko ildoa
Euskal Herrian Euskarazek urteroko Nazio Batzarra egin du Agurainen eta orain artekoaz hausnartzeaz gain, aurrera begirako ildoak landu ditu. Batetik, barne eztabaida egingo du datorren ikasturtean eta bestetik, bi ekitaldiren berri eman du: azaroaren 26an Ezabaketa Eguna egingo dute eta 2006ko apirilaren 2an, Santurtzin Hizkuntza Eskubideen Eguna.
Unibertsitateak Europar Batasunean
Udako Euskal Unibertsitateak antolatu du jardunaldia urriaren 28an. Europar Batasuneko goi mailako hezkuntza eremua orain ari da antolatzen eta Europako herrialde guztietako goi mailako sistemek eredu berrira egokitu beharko dute. Jardunaldietan prozesu honek Euskal Herriko unibertsitateei nola eragingo dien aztertuko dute.
Ikea lepotik helduta
Ikea multinazionalak Barakaldon ateak ireki zituenean euskararen presentzia urriagatik kexuak izan ziren. Katalunian gogor hartu dute Ikea. Generalitateak espedientea ireki zion otsailean 2006ko produktuen katalogoa gaztelaniaz baino ez argitaratzeagatik. Plataforma per la Llengua elkarteak katalanei eskatu die multinazionala salatzeko. 2006ko katalagoa katalanez dago sarean, aurten itzuli dute katalanera web orria ere eta Llobregat eta Badalonako dendetako seinalizazioek hizkuntz araudia betetzen dute. Katalan batzuk ordea gehiago nahi dute.
Erantzunak
Erantzunik ez dago.
Izartxoaz (*) markaturiko datuak derrigorrez bete beharrekoak dira.
Lege Oharra
RSS sindikazioa