Kukubiltxok Dir-dir txotxongilo ikuskizuna estreinatu du. Ikastolen Konfederazioarekin elkarlanean osatutako lana da eta Euskaraz Bizi egitasmoko Argitxo du pertsonaia nagusi.

Alex de la Iglesia zinemagile bilbotarraren Crimen ferpecto filma Europako Zinema Akademiak 2005eko film onenaren sarirako hautagaia da, beste 45 filmerekin batera. Saria Berlinen banatuko dute abenduaren 3an.

Marta Cardenas, Judas Arrieta eta Jose Llanos euskal artisten ehun artelan inguru ikusgai daude Bartzelonako Casa Asia museoan. Asiak hiru artistengan izandako eragina da 3 x Asia erakusketaren ardatza. Azaroaren amaiera arte izango da zabalik.

Jabier Muguruzak Abenduak 29 (Resistencia) diskoa atera berri du plazara. Angel Unzuren gitarrak eta Mireia Otzerinjauregiren ahotsak jantzi dute Muguruzaren diskoa. Irundarrak haur musikan espezializatutako Mara-mara diskoetxea sortu du eta abendurako kaleratuko du lehen diskoa.