Argia astekaria webgunearen hasiera

Nazioari buruzko eztabaida pil-pilean dagoenean, ez da ariketa makala 2025ean euskal nazioa zertan izango den irudikatzea. Baina ahalegina egin nahi izan dugu, euskal nazioaren garapena ardatz duten indar politikoetako ordezkariak bildu eta prospekzio politikoa egin dezatela eskatu diegu. Etengabe garatu eta moldatzen den kontzeptua da nazioarena, eta bere osotasunean jorratzeko entziklopedia bat beharko balitz ere, klabeak eskatu dizkiegu txostengileei. Non gaude gaur egun? Zeintzuk dira nazio ikuspegiaren erronka nagusiak? Zein lehentasun ditu Euskal Herriak datozen hogei urteetan? Eta nola, zer bide edo estrategia proposatzen du bakoitzak? Klabe ugari aurkituko ditu irakurleak, eta nazio eraikuntzan buru belarri murgiltzeko, gatazka politikoa gainditu beharra ere argi islatu da. Une politiko beroan egin dute hausnarketa egileek eta, agidanez, elkarrizketa giroak sortzen duen ilusio eta esperantza begi bistakoa da idatzi guztietan.