Argia astekaria webgunearen hasiera

Gipuzkoako Foru Aldundiak foru dekretua onartu du mezenasgoaren inguruan eta, horren arabera, kultura arloan lehentasunezkotzat jotzen dituen jardueratan aritzen diren enpresek sozietateen gaineko zergetan %50,5 bitarteko kenkariak eta PFEZ zergan onura garrantzitsuak izango dituzte. Besteak beste, jaialdiak, jardunaldiak, argitalpenak, fonografia, ikus-entzunezkoak, multimedia eta antzerkia jo ditu lehentasunezko jardueratzat. Aldundiko arduradunen esanetan, beste hainbat herrialdetan (Erresuma Batua, Alemania, Herbehereak...) horrelako kenkariak eskaintzen dira, baina ez dira %50,5eraino iristen. Kultur arloa sektore estrategiko izateko apustuaren baitan kokatu du Aldundiak dekretua.

Nafarroako, Espainiako nahiz nazioarteko kantautoreen musika erakusleiho izatea du asmo Barañaingo Auditorioan eta Atarrabiako kultur etxean egingo den Kanta Autor! zikloak. Egitarau oparoa osatu du Ojalá Nafarroako kantautore elkarteak, Barañaingo auditorioaren, Atarrabiako kultur etxearen eta Cadena 100en laguntzaz. Asteburu honetatik hasita eta urriaren 9a bitartean, ostiral, larunbata eta igande oro kontzertuak izango dira Barañainen. Besteak beste, Rafael Amor (Argentina), Adriana Olmedo (Nafarroa) eta Pablo Sciuto (Uruguay) izango dira taula gainean. Urriaren 14, 21 eta 28an berriz Atarrabiak hartuko du lekukoa eta José Nicolás (Kuba) eta Txus Remónen (Nafarrroa) kontzertuak jasoko ditu, besteren artean.

Bost urte bete ditu Donostiako Kursaalak eta urteurrena eraikinaren arkitektoaren gaineko erakusketa paratzeko baliatu dute: Rafael Moneo: museoak, auditorioumak, liburutegiak. Urriaren 23a arte Rafael Moneo arkitekto nafarrak hogeita hamar urtetan egindako lanak ikusi ahal izango dira, Kubo aretoan ipini dituzten argazki, maketa eta planoen bidez. Hala nola, Kursaala bera, Madrileko Thyssen-Bornesmiza museoa, Stockholmeko Arkitektura eta Arte Garaikide Museoa, Lovainako Arenberg liburutegia. Era berean, Oteiza Fundazioko patronatuko kide izendatu berriak Loiolako ibaiertzetarako diseinatu duen elizaren proiektua dago erakusgai.

Lau hilabetez itxita egon ostean, berriz ere zabaldu dute Iruñeko Gaiarre antzokia. Aurrealdea garbitu diote, berotze eta aireztatze sistemak aldatu dituzte, komunak berritu, 125 besaulki gehitu û900 ditu orain guztiraû... Ia bi milioi euroko aurrekontua izan du Iruñeko Udalak berrikuntzak egiteko. Aurten ere Chis Dolan dramaturgo eskoziarrak antzezlanak idazteko tailerra eskainiko du Gaiarren eta Victor Iriartek Ikusle Eskola gidatuko du. Halaber, ikusleei ikusi nahi lituzketen antzezlanak zein diren jakiteko egindako Así es, si así os parece (Horrelaxe izango da, halaxe nahi baduzue) egitasmoaren baitan aukeratutako La Casa de Bernarda Alba emango dute, besteak beste.

Zazpigarren aldiz musika elektronikoaz gozatu ahal izango da Donostiako hainbat taberna eta kultur etxetan (Ondarra, Branka, Etxekalte, Okendo kultur etxea, Arteleku...). Irailaren 30etik urriaren 9a arte, bertako eta nazioarteko hogeitik gora artistak parte hartuko du: Solo los solo, Florent y yo, Habana blues band, Tzesne... Urriaren 6an artista donostiarren gaua izango da eta zuzenean arituko dira hainbat aretotan, 8an Donostia Elektronikoa lehiaketako irabazleen txanda izango da.

Kultura aniztasuna sustatzea. Gure inguruko beste kulturekiko sentsibilizazioa piztea. Horiexek dira Tolosaldeko Irazki elkartearen helburuak. Xede horrekin apailatu du IpuinARTEan. Hainbat kulturako 36 artista eta idazlek (Iñaki Epelde, Angela Mejias, Juan Gorriti...) munduko hainbat kulturatako ipuin, mitologia eta elezaharrak oinarri hartuta egindako lanez osatutako erakusketa. Alberdaniak liburuan bilduko ditu lanok; testuak, euskaraz, gaztelaniaz eta jatorrizko hizkuntzan agertuko dira. Tolosan bisitatu ahal izango da erakusketa azaroaren 4a arte eta ondoren Eibarren, Donostian nahiz Leioan ikusi ahal izango da.

Liburu denda zabaldu du Frantziako Fnac kateak Donostiako San Martin azokan; lehena Euskal Herrian. 2.100 metro koadroko espazioan, liburu, DVD eta disko eskaintza oparoa du, euskarazkoa tartean. Donostiako kultur bizitza areagotzeko asmoa agertu dute arduradunek eta Zinemaldiarekin eta Jazzaldiarekin lan egiteko gogoa. Ia egunero kultur ekitaldiak jasoko ditu: liburu aurkezpenak, film emanaldiak, kontzertuak...

Anton Mendizabal eskultorearen Pilotaz proiektua, pilota jokoaren gaineko artelanez osatutako erakusketa, Euskal Herritik aterako da lehenengoz. Azaroaren 13a bitartean, Valladolideko Fundación Segundo y Santiago Montes-en izango da.

Soziedad Alkoholikaren diskoak Corte Inglés kateko dendetatik kendu dituzte. Pasa den astean Corte Inglés dendetan SAren diskoak saltzearen aurkako artikulua argitaratu zuten Minuto digital webgunean eta Corte Inglések diskoak erretiratu zituen egun gutxiren buruan.

Montxo Armendarizek zuzendutako Obaba filma aukeratu du Espainiako Zinema Akademiak Oscar sarietan Espainia ordezkatzeko, José Luis Garciren Ninette eta Fernando León de Aranoaren Princesas filmeekin batera. Abenduaren 29an jakingo da zeinek ordezkatuko duen Espainia.

Iker Yurrebasok estreinako narrazio liburua plazaratu du: Ametz. Zertu kultur elkartearen eta Harriketarrak Lemoako Gazte Asanbladaren laguntzaz argitaratu du.

Barbara Goenaga aktorea Argentinan da Vientos de agua telesaila grabatzen, Juan José Campanellaren zuzendaritzapean. Udan Italian izan zen Anastezi filma errodatzen.

Iñaki Martiarena Mattin marrazkilariak ipuin kontaketa saioak eskainiko ditu marrazkiez lagunduta udazkenean. Belardo belar metaren ibilerak ikuskariak Leaburu, Belauntza, Amezketa eta Irura bisitatuko ditu, besteak beste.

Asier Altuna zinema zuzendariaren hitzok jaso zituen Berriak: «Bizitza ikusteko dugun era agertzen da filmetan, baina erabat inkontzientea da, konturatu gabe gertatzen da. Ez dugu inoiz lanik egiten gai edo trauma bati begira. Ideiak, ordea, konturatu gabe errepikatzen ditugu, belaunaldiarena bezala. Gizarte honi egiten diogun kritika hortxe dago».

Andoni Egañak UKri esanak: «Uste dut jakinduriak ez daukala zerikusirik komunikazioarekin, bertsolaritzarekin, ahozko ekimenarekin. Horregatik, bertsolari bat berdin-berdin izan daiteke arotza edo topografoa. Kontua da bere bertso unibertsoa eta bere tradizio unibertsoa lantzea, eta hori berdin egiten dute igeltsero batek eta kazetari batek».

Anjel Alkainek zera adierazi zion Aizuri: «Elkarrizketa guztietan galdetzen didate euskal umorea ba ote dagoen, zer den eta abar. Umorea unibertsala da, hori lehendabizi, eta gero pertsonek egiten dute, eta gutxienekoa da pertsona horiek euskaldunak edo murtziarrak diren».

Benito Ansola Garan: «Euskal zinema da batzutan euskaraz eta beste batzutan erdaraz egiten dena. Baina bertokoa izanik bertoko kutsua izan behar du, nahiz eta balore unibertsalez hitz egin».