Kataluniako PSCko parlamentaria dugu, Katrinak ekarri hondamendiak bertan harrapatu zuena. Irratiz entzun nuen bere bizipena kontari. Ba omen zuen Bushen Administrazioak zetorkeenaren berri. Ba omen zekiten Pontchartrain lakuaren uretatik hiria babesten zuen ezponda ez zegoela bere onean eta antolatu behar zela. Adabakiak han eta hemen, ez omen zuten aski dirurik bozkatzeko ohiturarik ez zuten herritarrak babesteko. Ez zegoen hori AEBetako Gobernuaren lehentasunetan. Eta emandako zifra zenbaiten artean, bat gelditu zitzaidan gogoan iltzaturik : 100.000 milioi dolar behar omen ditu urtero Irakeko okupazio gerra mantentzeko. New Orleanseko irudietan, telebistetan ikus ditzakegun ur hil ustel horiek gardenak ditugu oso Bushen Gobernuarekin alderatuta. Planetako apopiloak baino jabeak bailiran aritzen zaizkigunak, beren estrategi bakarra berehalako etekinetan oinarritzen duten horiek ditugu hondamendira garamatzatenak, munduaren historia beraiekin bukatu beharko balitz bezala. AEBen ikurraz estali nahiko dituzte bertako miseriak, eta solidaritatea galdetu %30a pobreziaren neurriaren azpitik bizi diren gizartea etxean dutenek. Hildakoen kopuruak tasa hori behera eramango du, noski.