Maurizia Aldeiturriaga pandero jole handia jaio zela ehun urte bete dira. 1904an edo 1905ean jaio zen. Erreka-laino nahasgarri bat egongo ote zen egun hartan? Erreka-lainoa egongo zen, bai, Mauriziak berak esaten baitzuen "gaztainapekoa" zela, hots, mami beilegidun fruitu leunok agertzen diren tertziokoa.

Gaztainapeko jaiotza horren inguruan argibide gehiago eskatu eta hara non, euskararen gurari batengatik edo, ezin izan zuten etxekoek eurek ere hilabetea ebatzi: urrietakoa ei zen. Urri lehenengoa edo urri bigarrena, ezin jakin.

Lamien bila Zeberioko erreka goldearekin pasatzen zuten garai lanbrotsu haien adibide itzela, Mauriziaren mendea ertz jakinik gabeko kontzeptu bat da, gaur egungo zehaztasun-nahiarekin guztiz bat ez datorrena. Bere ahotsa ere halakoxea zen, pintzela busti orduko gelako argia aldatzen zaion pintorearen eskua bezain moldakorra.

Mauriziaren mendea izan da XX.a, inondik ere. Gauza asko joan zaizkigu. Katearen hurrengo begia gara gu. Hala ere, Leonen alboka lagun kantatzen entzuten dugun aldiro durundu batek hartzen digu bihotza, zer edo zer gogoratuko bagenu bezala, gaztainapean jaio ginela gu geu ere.