Argia astekaria webgunearen hasiera

UEFA txapelketa xede, zubi aurrean gelditu da Athletic penaltiak zigor. Interlotoa. Mendilibarren aroak ez du hastapen egokia izan. Klubak parte hartzea erabaki lehiaketaren egutegia, inongo prestatzailerik gustukoa ez duena da, taldea egituratzeko asti eza eta udako bero sapak ez baitira lagun onak itxurazko ezer egiteko. Motorrak behar duen kemenaren eskasian, patar arinena ere malda gaitza. Bukatu berriaren denboraldiaren ajeak gainditu gabe berriari hasiera eman beharrak, edozeini sortzen dizkio nagiak, gazteenei entrenatzaile berriaren etorrerak ekar diezazkieken itxaropen bizia motelduz. Eta zubi aurretik pasa ezin horrek ligarako ere bere ondorioa izan lezake, oporretatik fresko-fresko etorritako jokalari ohikoek duten abantaila baliatu baitezakete gazte eta ezohikoen kaltetan. Intertontoarena ez dela inorentzat pagotxa alegia, aurrera egiten ez denean. Jakina, zuzendaritzaren helburua eta profesionalena bat ez delarik, kaltetu zuzenak beti ere aldagelatakoak, zaletuen aurrean azterketak pasa behar izaten dituztenak. Espainiako ligan ongi hasteak, Errealari estrainekoan irabazteak ase dezake ingurua momentuz, baina lortuko ez balute gaixo Mendilibar. Dagoeneko kazetari azkarrenak zain dauzka labana gerrian.