Argia astekaria webgunearen hasiera

Askotan entzun izan dugu halako talde bankario edo industrialaren emaitza kontsolidatuak honenbestekoak izan direla. Zer esan nahi da kontu edo emaitza kontsolidatuez hitz egiten denean? Enpresa guztiek dute urteko kontuak aurkezteko obligazioa. Kontabilitateko egoeraren agiriak izaten dira, eta aldian-aldian aurkeztu behar izaten dituzte, akziodunak eta enpresa-komiteak informatzeko edota instituzio tributario edo finantzarioen errekerimenduz. Bada, zenbait enpresak sozietate-talde bat eratu ohi dute, elkarbanatutako zuzendaritzarekin. Bi adibide jarriko ditugu. BBVA taldea mundu osoan barreiatutako hainbat enpresak osatzen dute, baina zuzendaritza bat du. IZAR taldeak -Sestaoko La Naval enpresa zegoen hor- hainbat enpresa ditu Espainiako Estatuan, baina zuzendaritza bakarra. Bada, talde horiek urteko kontu kontsolidatuak aurkeztu behar dituzte. Kontuak prestatzean, eliminatu egin behar dituzte elkarrekiko kredituak eta debituak, bai eta sozietate bakoitzak talde bereko kide diren beste batzuekin egindako operazioen ondorioz lortutako mozkinak ere. Horrela, urteko kontu kontsolidatuek taldeak hirugarrenei buruz izandako emaitza eta ondare netoak erakusten dituzte -dagozkien zergak alde batera utzita-.

Mikel Alvarez AHTren Aurkako Asanbladako kideak kritika egin dio EHAKri «Ibarretxeren inbestiduran AHT geldiarazteko agertutakoaren konpromiso falta» dela eta. Alvarezen ustez, EHAK-k ez du «bere indarra baliatu AHT eta gainerako proiektu txikitzaileak geldiarazteko eskakizuna eztabaidaren erdian jartzeko». Besteak beste, zera galdetzen du: «Moratoria baten alde egindako adierazpen testimoniala izan al da EHA-k egin zezakeen guztia? Uztailaren 1ean Berriara bidalitako gutunean azaldu du bere kritika Alvarezek. AHTren lanak urrian hasiko direla ere salatu du.

Madrilen sonatua izan da AVTk Pedro Cerracin abokatua kaleratu izana, azken 17 urteetan bere zerbitzupean izan ondoren. Isilunearen ondoren ABCri eman zion elkarrizketa: «Finantz aparatoa da terrorismoaren burua, hori da urte hauetan guztietan ulertu dudana. ETArentzat garrantzitsuena ez direla bere presoak, zerga iraultzailea biltzea baizik. Gobernuaren eta oposizioaren borondate onean sinesten dut, eta begirunea diet biei». 18/98 Auzian berak ordezkatzen zuen AVTren akusazioa eta ETAren aurkako borrokaren inguruko iturrietan, erakunde armatuaren finantzei buruz gehienetarik dakienetakoa omen da. Ildo horretatik, kazetariak galdetzen dio auzia ez ote den umezurtz geratu bera gabe: «Ezta pentsatu ere, erabateko konfiantza dut AVTk ni ordezkatzeko hautatuko duen pertsonan. Behar nauen denean izango nau aldamenean».

Nafarroako Ikastolen Elkarteak Nafarroako Gobernuari egin dio proposamena: eremu ez-euskaldunean dauden ikastetxeak legezta ditzala. Bost urteko hitzarmena litzateke eta orain erantzunaren zain dira. Hitzarmen horretan 540 ikasle sartuko lirateke, eremu ez-euskalduneko Tuterako, Lodosako, Vianako eta Irunberriko ikastetxeak eta eremu euskalduneko Berako ikastetxea. Berako Labiaga ikastolak Derrigorrezko Bigarren Hezkuntza zikloa legeztatu gabe du oraindik.

Hizkuntza Eskubideen Behatokiak Lapurdiko, Zuberoako eta Nafarroa Behereko 2004ko emaitzak aurkeztu ditu. Behatokiko arduradunek ez dute panorama oso polita agertu. Behatokiko zuzendariak, Paul Bilbaok adierazi duenez, Frantziako Estatua hizkuntz minorizatuekiko tolerantea dela esan izana hankasartzea da, azken hamar urteetan egin duen politika gero eta murriztaileagoa eta jakobinoagoa izan baita. Frantziako Estatuak politika egokia ez duela egiten salatu du Behatokiak eta hori ere hizkuntz politika aurrera eramateko modu bat dela. Herritarrek Behatokiari bidalitako salaketen artean daude Hiru Saretak (Seaska, Euskal Haziak, Biga Bai) egindakoa eta SNCF Frantziako tren konpainiari, Postari eta Justizia alorrari egindakoak.

Europako erakundeetan aurrerapauso handiagoa eman du Espainiako Senatuan eta Kongresuan baino. PPk, PSOEk, Entesa Catalanak (ERC, PSC eta IC-V) eta Coalición Canariak egindako proposamenaren bidez, Senatuko erkidegoen batzordean euskaraz egin ahal izango da eta baita Senatuko Buletin Ofizialean legez besteko ekimenen bat argitaratu nahi denean eta mozio, interlokuzio edo galdera bat argitaratzean. EAJk, CiUk eta BNGk beste proposamen bat aurkeztu zuten, baina azkenean, besteen proposamenari baiezkoa ematea erabaki zuten, oso gutxi bada ere, hizkuntza gutxituek Senatuan aurrera egin dezaten.