Argia astekaria webgunearen hasiera

Gazte eta gaztetxoentzat prestatu dute Xabiroi komikia. Gazteen arteko euskararen erabilerak kezkatzen ditu Ikastolen Konfederazioko arduradunak eta komiki honek ikasgelatik kanpoko erabilera bultzatzen laguntzea nahiko lukete. Ikastolen aldizkariarekin batera banatuko dutenez, 35.000 aleko tirada izango du Xabiroik. Ikasturteko hiru zenbaki kaleratuko dituzte eta datorren urtean liburu-dendetan salgai jarriko dute. Komiki aldizkariaren arduraduna Dani Fano marrazkilaria izango da eta besteren artean marrazkilari eta gidoigile arituko dira Harkaitz Cano, Asisko Urmeneta, Marko Harmspach, Joxean Muñoz eta Manu Ortega.

Urruñako Gipuzkoa, Bizkaia eta Lapurdiko 30 kide inguruk sortu dute Justizia Euskaraz elkartea. Besteak beste, abokatuak, prokuradoreak, epaileak eta unibertsitateko irakasleak dira elkartean. Elkartearen helburua Justizia Administrazioan euskaldunen hizkuntz eskubideak betearaztea da. Euskara ofiziala den tokietan, ofizialtasun hori benetan bete dadin eskatuko dute. Ofiziala ez den tokietan, lehenengo urratsa ofizialtasuna eta Justizia Administrazioan euskararen erabilera babestuko duten arautegi eta bitartekoak aldarrikatzea izango da. Esteban Umerez, elkarteko lehendakariak, dioenez, «gizarte arlo askotan euskara urrats sendoak ematen ari den bitartean, Justizia Administrazioarekiko hartu-emanen egoera erabat negargarria da».

Urruñako ikastolak (Lapurdi) lehen urratsak 1995ean eman zituen. Ikastola askoren moduan ikasle gutxirekin hasi ziren lanean, gela bakarrean. Ikasleak eta beharrak ugaldu ziren urteen poderioz eta 1999an eraikin berria inauguratu zuten. Orain, eraikin berri horretan eskolak ematen ari direla, ikastolaren sorreraren hamargarren urteurrena ospatuko dute ekainaren 19an. Euskara mihian irria begian lelopean egun osorako egitaraua prestatu dute ikastolako arduradunek.

Topaguneak (Euskara elkarteen federazioa) uztailaren 14 eta 15erako ikastaroa prestatu du hedabideen beharrizanak aztertu asmoz. Ikastaroak Tokiko hedabideen erronkak: irakurleak, publizitatea eta argitalpena du izenburu eta gai hauei buruz hausnartuko dute: Nork irakurtzen du gure argitalpena?; Publizitatea eta tokiko aldizkariak: barruko eta kanpoko faktoreen analisia; Hedabideen krisia; Doako egunkariekin lehian; Fidelizazioa: erreferentzialtasunaren bila; web orria eta argitalpena zelan lotu.

Denboran eta espazio geografikoan barrena jarduera ekonomikoak jasaten duen fluktuazioa da ziklo ekonomikoa. Ekonomiaren adar guztietan nabaritzen diren segidako hedatze eta uzkurtzeak direla medio sumatzen dugu fluktuazio hori. Munduko herrialde guztietan gertatzen dira, unearen arabera, hainbat ziklo ekonomiko, baina denek agerbide berak izaten dituzte. Ziklo ekonomikoan, funtsean, lau fase bereizten dira.

- Lehen fasea DEPRESIOA da, eta benetako ahalmenen aldean desenplegu-maila altua eta kontsumo-maila apala izateak ezaugarritzen du.

- Bigarren fasea enpleguko, errentako eta kontsumoko mailen ERREKUPERAZIOA da, eta prezioen beheraldiarekin batera etorri ohi da.

- Hirugarren fasea, ESPANTSIOA, enplegu beteko garaia izaten da, inbertsio ugarikoa eta lan-indar urrikoa, batez ere langile gaituei dagokienez.

- Azkenik, ERREZESIOKO fase bat ere izaten da, pagamenduen etendurekin, enpresen porrotekin eta enpleguko eta produkzioko mailaren beherakadarekin ager daitekeena. Euskal Herriak azken hamarkada hauetan adierazi ditugun fase guztiak ezagutu ditu. Gaur egun gauden fasea errekuperaziokoa izan liteke.